O‘zbekstonda kuzatilayotgan anomal sovuq havo oqibatlarini yumshatish maqsadida turli idora va vazirliklar tomonidan energiya resurslaridan muammo bo‘layotgan hududlarda shtablar ish olib bormoqda. Xususan, Milliy gvardiya ham Toshkent shahrining bir nechta tumanlariga biriktirilgan.
Milliy gvardiya matbuot xizmati rahbari Davron Jumanazarovning aytishicha, aholidan kelib tushgan murojaatlar o‘rganilib, holat joyida bartaraf qilinmoqda.
“Uchtepa tumanining ‘Kattaqo‘rg‘on’ mahallasida joylashgan 12 ta ko‘p qavatli uylarda elektr energiyasidan uzilish bo‘lgan edi. Jalb qilingan kuchlar natijasida texnik nosozlik tezlik bilan bartaraf etildi”, — dedi Davron Jumanazarov.
Uning qo‘shimcha qilishicha, aholiga yordam qilish uchun har bitta ishchi guruhga biriktirilgan joyda harbiy oshxona palatkalari o‘rnatilgan.
“Svet o‘chgan va gaz bosimi tushgan holatda energiya resurslarini tiklab bergunimizga qadar aholi palatkada isinishi, yengil nonushta qilishi mumkin. Shuningdek, tushki va kechki ovqatga issiq taomlar tarqatilmoqda. Aholiga yordam berish bilan birga, yoshlarda harbiy xizmatga bo‘lgan qiziqishni orttirishga harakat qilyapmiz”, — dedi Milliy gvardiya xizmatchisi.
Qo‘shimcha qilinishicha, asosiy vazifa sifatida energetik uzilishlarni bartaraf etishda mutaxassislarga yaqindan yordam ko‘rsatish belgilangan. Bunda kerakli moddiy texnik bazani tezkor va uzluksiz yetkazib berish, xizmat ko‘rsatuvchi brigadalarga sharoit yaratish ko‘zda tutilgan.
Izoh (0)