Бухоро ва Андижонда газ таъминотига ноқонуний уланиб, умумий 300 млн сўм зарар етказган фуқаролар ушланди

Бухоро ва Андижон вилоятларида табиий газ тармоқларига ноқонуний уланиш ҳолатлари фош этилди, деб хабар бермоқда Иқтисодий жиноятларга қарши курашиш департаменти.

Қайд этилишича, Бош прокуратура ҳузуридаги департаментнинг Бухоро вилоят бошқармаси томонидан «Ромитантумангаз» газ таъминоти бўлими ходимлари билан ҳамкорликда терговга қадар тезкор тадбир ўтказилган. Унда «С.С.» фермер хўжалиги раҳбари С.Р. фермер хўжалигига қарашли иссиқхонани ўзбошимчалик билан газ тармоғига улаб, давлат ва жамият манфаатларига 198,2 миллион сўм зарар етказгани аниқланган.

Шунингдек, департаментнинг Андижон туман бўлими томонидан ДХХ ва «Ҳудудгаз Андижон» филиали ходимлари билан ҳамкорликда терговга қадар текширув ўтказилган. Унда фуқаро Ш.I. Олтинкўл тумани «Миробод» МФЙ ҳудудида иссиқхона ташкил этиб, ўзбошимчалик билан газ тармоғига уланиб, 103,8 миллион сўмлик табиий газдан ноқонуний фойдалангани аниқланган.

Мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилган. Ҳозирда тергов ҳаракатлари ўтказилмоқда.