Eron bahorda Rossiyadan qiruvchilar, havo mudofaasi tizimlari, raketa va vertolyotlar oladi

Eron hukumati mart oyida Rossiyadan Su-35 qiruvchi samolyotlari, shuningdek, havo hujumidan mudofaa tizimlari, raketa komplekslari va vertolyotlar olishni rejalashtirmoqda. Bu haqda Eronning Tasnim agentligi parlamentning milliy xavfsizlik va tashqi siyosat komissiyasi a’zosi Shahriyor Haydariyga tayanib xabar berdi.

Haydariyning ta’kidlashicha, Su-35 taxminan mart oyining oxirida Eronga yetkazib beriladi. Samolyotlardan tashqari Eron Rossiyaga boshqa harbiy texnika, jumladan, havo hujumidan mudofaa tizimlari, raketa komplekslari va vertolyotlarga buyurtma bergan. Ushbu texnikalarning aksariyati tez orada kelishi kerak.

Avvalroq ommaviy axborot vositalari Eron 24 ta to‘rtinchi avlod qo‘shaloq dvigatelli qiruvchi samolyotlarini olishi haqida xabar bergandi.

So‘nggi yillarda Tehron birorta ham yangi qiruvchi olmagan, bir nechta rus MiG-29 qiruvchilarini esa 1990-yillarda sotib olgandi.

Qayd etilishicha, Eron va Rossiya yaqinda iqtisodiy, savdo, energetika va harbiy hamkorlikni kuchaytirishga qaratilgan yirik kelishuvlarni imzolagan.