O‘zbekiston harbiy delegatsiyasi Hindistonning Kumaon viloyatidagi Uttarakxand shtatining Pitxoragarx shahridagi tog‘li hududda joylashgan Xalqaro tayyorgarlik poligoniga tashrif buyurdi. Bu haqda Shimoli-g‘arbiy harbiy okrug matbuot xizmati “Daryo”ga ma’lumot berdi.
Qayd etilishicha, tashrif O‘zbekiston va Hindiston o‘rtasida imzolangan 2022—2023-yilga ikki tomonlama harbiy hamkorlik rejasiga muvofiq, 2023-yilda o‘tkazilishi rejalashtirilgan “Do‘stlik-2023” birgalikdagi o‘zbek-hind o‘quvini muvofiqlashtirish maqsadida amalga oshirilgan.
O‘zbekiston Respublikasi Mudofaa vazirligi boshqarma boshlig‘i polkovnik Rasul Japarov hamda Shimoli-g‘arbiy harbiy okrug qo‘shinlari qo‘mondonining o‘rinbosari polkovnik Ismoil Qurbonov hindistonlik hamkasblari bilan shu yilning fevral-mart oylarida rejalashtirilayotgan hamkorlikdagi o‘quvlarni o‘tkazish, O‘zbekiston harbiy kontingentini qabul qilish va joylashtirish hamda ta’minot masalalarini kelishib olgan.
Mazkur uchrashuvda ikki mamlakat vakillarining qo‘shimcha takliflari e’tiborga olinib, ikki davlat harbiylari ishtirokida sport va madaniy tadbirlarni ham tashkil etish bo‘yicha tavsiyalar rejaga kiritilgan.
Izoh (0)