Farg‘onada noqonuniy diniy ta’lim berish bilan shug‘ullanib kelayotgan shaxs aniqlandi

Farg‘ona viloyatining Buvayda tumanida fuqaro noqonuniy diniy ta’lim berish bilan shug‘ullanib kelayotgani aniqlandi.

4-yanvar kuni Farg‘ona viloyati IIB TEQKB xodimlari tomonidan o‘tkazilgan tezkor tadbir davomida, Buvayda tumanida 2022-yilning dekabr oyidan buyon noqonuniy diniy ta’lim berish bilan shug‘ullanib yurgan shaxsning qilmishlariga chek qo‘yilgan.

Jov mahalla fuqarolar yig‘inida yashovchi S.H. ismli fuqaro yashash xonadonida jami 6 nafar shaxsga noqonuniy diniy ta’lim berib kelayotgani aniqlangan. Undan dars olayotganlarning besh nafari voyaga yetmaganlar bo‘lib, turli tumanlardan kelib tahsil olayotgani ma’lum bo‘lgan.

Holat yuzasidan ushbu fuqaroga Ma’muriy javobgarlik to‘g‘risidagi kodeksning 241-moddasi bilan hujjatlar rasmiylashtirilib, tegishli sud organiga yuborildi.