Qashqadaryo viloyati markazi bo‘lmish Qarshi shahridagi mahallalarning birida juda abgor ko‘cha bor. Shu ko‘chada yashovchi aholi vakillari muammo haqida jar solsa-da, shahar mas’ullari muammoga e’tibor qaratmayotgan ekan.
Bu haqda “Daryo” muxbiri bilan suhbatlashgan murojaatchilarning aytishicha, “Gungon” mahallasi “Obod mahalla” dasturiga tushgan. Mahalladagi barcha ko‘chalar ta’mirlanib, zamonaviy holga keltirilgan. Biroq “Navo” ko‘chasi rahbarlarning qora ro‘yxatiga kirgan, shekilli, shunaqa achinarli ahvolda yotibdi.
Bizning mahalla “Obod mahalla”ga kirgan. Hamma ko‘cha asfalt va beton bo‘ldi. Lekin bizning ko‘chamiz asfalt bo‘lgani yo‘q. 60 kundan beri hamma rahbarlar aldaydi. Ko‘cha asfaltga tayyor qilingan, lekin hech qaysi rahbar kelib o‘rganmadi, — deydi shu ko‘chada yashovchi murojaatchi.
Qashqadaryolik faol blogerlardan biri Husan Komiljonovning ma’lumot berishicha, u mazkur muammo haqida jamoatchilikka ma’lumot berganidan so‘ng Qarshi shahri hokimligi bu bo‘yicha fotolar e’lon qilib, loy ko‘cha asfaltlashtirilishga tayyor holga keltirilgani haqida xabar bergan. Ammo murojaatchilar aytganidek, hamon asfaltlash ishlari bajarilmagan.
Bu haqda “Daryo” so‘roviga javob bergan Qarshi shahri hokimligi axborot xizmati rahbari Umid Jabborov bu borada haqiqatan ham muammo borligini tan oldi va tez orada bu ishlar yakuniga yetkazilishini bildirdi.
Ushbu ko‘cha asfaltlashtirish uchun tayyor holga keltirilgan. Ammo buyurtma qilingan bitum o‘z vaqtida yetib kelmayotgani sabab ishlar ortga surilgan. Bu haqda murojaatchilarga to‘g‘ri tushuntirish berilgan. Imkon tug‘ilishi bilan ushbu ko‘chaga yotqizilishi lozim bo‘lgan bitum olib kelinadi va aholiga qulaylik yaratiladi, — deydi hokimlik vakili.
“Daryo” voqealar rivojini kuzatishda davom etadi.
Izoh (0)