Қашқадарё вилояти маркази бўлмиш Қарши шаҳридаги маҳаллаларнинг бирида жуда абгор кўча бор. Шу кўчада яшовчи аҳоли вакиллари муаммо ҳақида жар солса-да, шаҳар масъуллари муаммога эътибор қаратмаётган экан.
Бу ҳақда «Дарё» мухбири билан суҳбатлашган мурожаатчиларнинг айтишича, «Гунгон» маҳалласи «Обод маҳалла» дастурига тушган. Маҳалладаги барча кўчалар таъмирланиб, замонавий ҳолга келтирилган. Бироқ «Наво» кўчаси раҳбарларнинг қора рўйхатига кирган, шекилли, шунақа ачинарли аҳволда ётибди.
Бизнинг маҳалла «Обод маҳалла»га кирган. Ҳамма кўча асфальт ва бетон бўлди. Лекин бизнинг кўчамиз асфальт бўлгани йўқ. 60 кундан бери ҳамма раҳбарлар алдайди. Кўча асфальтга тайёр қилинган, лекин ҳеч қайси раҳбар келиб ўрганмади, — дейди шу кўчада яшовчи мурожаатчи.
Қашқадарёлик фаол блогерлардан бири Ҳусан Комилжоновнинг маълумот беришича, у мазкур муаммо ҳақида жамоатчиликка маълумот берганидан сўнг Қарши шаҳри ҳокимлиги бу бўйича фотолар эълон қилиб, лой кўча асфальтлаштирилишга тайёр ҳолга келтирилгани ҳақида хабар берган. Аммо мурожаатчилар айтганидек, ҳамон асфальтлаш ишлари бажарилмаган.
Бу ҳақда «Дарё» сўровига жавоб берган Қарши шаҳри ҳокимлиги ахборот хизмати раҳбари Умид Жабборов бу борада ҳақиқатан ҳам муаммо борлигини тан олди ва тез орада бу ишлар якунига етказилишини билдирди.
Ушбу кўча асфальтлаштириш учун тайёр ҳолга келтирилган. Аммо буюртма қилинган битум ўз вақтида етиб келмаётгани сабаб ишлар ортга сурилган. Бу ҳақда мурожаатчиларга тўғри тушунтириш берилган. Имкон туғилиши билан ушбу кўчага ётқизилиши лозим бўлган битум олиб келинади ва аҳолига қулайлик яратилади, — дейди ҳокимлик вакили.
«Дарё» воқеалар ривожини кузатишда давом этади.
Изоҳ (0)