Namanganda mukammal ta’mirlangan “Matbuot uyi” foydalanishga topshirildi

Namanganda mukammal ta’mirlangan “Matbuot uyi” foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.

Mazkur bino 1979-yilda qurilgan va shundan beri ta’mirlanmagan edi. Joriy yil boshida bu yerdagi holatni ko‘zdan kechirgan viloyat hokimi Shavkat Abdurazzaqov “Matbuot uyi”ni zamonaviy ko‘rinishga keltirish va jurnalistlar uchun qulay sharoitlar yaratish bo‘yicha ko‘rsatmalar berdi.

Shundan so‘ng bu yerda ta’mirlash ishlari boshlab yuborildi. Buning uchun 2,6 milliard so‘m mablag‘ sarflandi. Isitish tizimi tubdan yangilandi, zamonaviy mebel va kompyuter jihozlari o‘rnatildi.

“Bundan o‘ttiz yil avval ‘Yuzsiz‘ filmi shu yerda suratga olingan ekan. O‘shandan beri binoda deyarli hech narsa o‘zgarmagandi. Endi bu binoni zamonaviy mediamarkaz ko‘rinishiga keltirishimiz, bu yerda turli tadbirlar, jumladan, matbuot anjumani va brifinglar o‘tkazish uchun barcha sharoitlarni yaratib berishimiz zarur”, — dedi viloyat hokimi Shavkat Abdurazzaqov.

Ma’lumot uchun, Namangandagi “Matbuot uyi”da viloyat hokimligini “Namangan haqiqati” va “Namanganskaya pravda” gazetalari, tarmoq nashrlari, O‘zbekiston jurnalistlar uyushmasining viloyat bo‘limi joylashgan.

Mavzuga doir:

Namanganda 400 dan ortiq oila vakillariga bayram sovg‘alari topshirildi. Ularning ro‘yxati jurnalist va blogerlar tomonidan shakllantirildi