Қалин туман ва кўриш чегарасининг пастлиги Фарғона водийсидаги бир нечта халқаро аэропортларда самолётларни қабул қилиш ва жўнатишлар кечиктирилишига сабаб бўлди, деб хабар бермоқда Uzbekistan Airports матбуот хизмати.
Хусусан, манзил аэропортидаги ноқулай об-ҳаво туфайли Uzbekistan Airways’нинг HY87 Урганч — Фарғона рейси Урганч аэропортида ушлаб қолинди. 73 йўловчиси бўлган самолёт маҳаллий вақт билан соат 09:35 да учиши керак бўлган.
Кўриш чегараси 25 метрдан кам бўлганлиги сабабли HY71/72 Фарғона—Самарқанд, HY84 Фарғона—Тошкент рейслари бекор қилинди. Шунингдек, Фарғона аэропорти Санкт-Петербургдан учган самолётни қабул қила олмади ва борт Тошкент аэропортига йўналтирилди. Uzbekistan Airways’нинг HY9628/9627 Тошкент—Фарғона—Москва ва HY081 Тошкент—Фарғона йўналишидаги рейслари учиш вақти ўзгартирилди.
Қуюқ туман (кўриш — 300 метр) HY622 Москва—Андижон рейси учиш аэропортида бир неча соатга кечиктирилишига сабаб бўлди. Ҳозирда самолёт кутиш зонасига йўналтирилди ва муқобил аэродромга жўнаб кетади.
Шунингдек, ноқулай об-ҳаво шароити туфайли Наманган аэропортида бир қатор рейслар қолдирилган. Беқарор об-ҳаво туфайли аэропорт вақти-вақти билан самолётларни қабул қилиш ва жўнатишларни чеклашга мажбур бўлмоқда.
Фарғона, Андижон ва Наманган халқаро аэропортларида об-ҳаво шароити яқин орада яхшиланишини кутилмоқда.
Изоҳ (0)