Qashqadaryo viloyatining Ko‘kdala tumanida o‘z xizmat vazifasini bajarayotgan MIB xodimlari qarzdor fuqarolar va ularning yaqinlari tomonidan kaltaklandi. Bu haqda “Daryo”ga xabar bergan MIBning viloyat boshqarmasi axborot xizmati rahbari Gulnoza Dilmurodovaga ko‘ra, holat yuzasidan Ko‘kdala tuman prokuraturasi tomonidan jinoyat ishi qo‘zg‘atilgan.
Ma’lum bo‘lishicha, 2022-yilning 9-dekabr kuni taxminan soat 11:00 lar atrofida Byuroning Ko‘kdala tuman bo‘limi davlat ijrochilari E.I. va U.Yu. Jinoyat ishlari bo‘yicha Chiroqchi tuman sudining 2022-yil 22-apreldagi qaroriga ko‘ra, javobgar aka-ukalar — R.E. va R.E.larning hisobidan da’vogar A.Q.ning foydasiga javobgarlarning har biridan 4 million 805 ming 400 so‘mdan jami 9 million 610 ming so‘m moddiy va ma’naviy zarar undirish uchun borgan.
Qarzdor R.E. MIB xodimlari oldiga boshqaruvida bo‘lgan Nexia avtomobilida kelgan paytda MIB xodimlari qarzdorlik evaziga avtomobilni xatlamoqchi bo‘lgan. Bunga javoban qarzdor R.E. va uning yaqin qarindoshlari ijro harakatlarini amalga oshirayotgan davlat ijrochilariga qo‘pol munosabatda bo‘lib, baland ovozda ularni haqorat qilgan. Shuningdek, ularni urib, tepib ijro harakatlarini yakunlashga qarshilik ko‘rsatgan. Bu ham yetmagandek, qarzdor R.E. avtomashinani boshqarib, hodisa joyidan ketib qolgan.
Mazkur hodisa yuzasidan Ko‘kdala tumani prokurori tomonidan A.Elmurodovga nisbatan Jinoyat kodeksining 219-moddasi 2-qismi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilib, dastlabki tergov harakatlari olib borilmoqda, — deydi Gulnoza Dilmurodova.
Izoh (0)