Қашқадарёда талаба ноўрин танқидларга жавоб қайтарувчи блогерлар жамоаси тузишни таклиф қилгани ва бунга жавобан вилоят ҳокими Муроджон Азимов томонидан вилоят ҳокимлигига ишга қабул қилингани хабар берилганди. Мазкур хабар жамоатчилик муҳокамасига сабаб бўлгач, вилоят ҳокимлиги мазкур масалага муносабат билдирди.
Кеча вилоят ҳокими Муроджон Азимов Қарши давлат университетида бўлиб, талаба-ёшлар билан очиқ мулоқот қилди. Уларнинг таклиф ва муаммоларини тинглади. Ушбу жараёнда журналистика соҳасига қизиқувчи, бир қатор нашрларда ўзининг таҳлилий мақолалари билан юртимизда амалга оширилаётган ижобий ўзгаришларни ёритиб келаётган талаба-қиз ўз таклифини билдирди. Унинг таъкидлашича, соҳага қизиқувчи кўнгилли талаба-ёшлардан иборат «Ёш блогерлар» жамосини тузиш ва улар учун зарур бўладиган моддий-техника воситалари билан таъминлаш таклифини билдирди. Шу жойда вилоят ҳокими таклиф юзасидан бирор фикр билдирган эмас. Қизнинг таклифига эътибор берсангиз, «АОКА вилоят бошқармаси қошида ташкил этсак», деган жумлалар бор. Бу таклиф, холос, — дейди вилоят ҳокимлиги ахборот хизмати раҳбари Аҳрор Содиқов.Таъкидланишича, вилоят ҳокими талаба-қизнинг бошқа масалаларда берган фикрлари, мулоқот давомида фаол бўлганлигини ҳисобга олиб, уни вилоят ҳокимлигига ишга қабул қилишини айтган.
Талаба ишга қабул қилинган тақдирда ҳам лавозими доирасидаги ишни олиб боради. Масалан, ҳокимликнинг ижтимоий бўлимига ишга ўтса, таълим ва соғлиқни сақлаш соҳасида, туризм бўлимига ишга ўтса, туризм соҳасини ривожлантириш борасида иш олиб боради, — дейди масъул.Ҳокимлик ахборот хизмати вилоят ҳокими томонидан талаба қизга иш таклиф қилинганини ёшларга берилаётган эътибор, уларнинг интилиш, ташаббусларини қўллаб-қувватлаш ва шу орқали, бошқа ёшларга ҳам мотивация беришдан иборат эканлигини айтмоқда.
Шуни алоҳида таъкидлаш лозимки, ёшлар, хусусан, талабаларни ишга жойлаштириш, уларнинг қўшимча даромад топиш бўйича ташаббусларини қўллаб-қувватлаш доимо вилоят ҳокимининг эътиборида бўлиб келмоқда. Хусусан, жорий йилнинг 11 ойи давомида ҳозирда талаба сифатида кундузги бўлимда ўқиётган уч мингга яқин ёшларни ишга жойлаштирилгани бу борада олиб борилаётган ишларнинг яққол намунасидир. Ёшларни, талабалик давридан, давлат хизматига жалб қилиш, олган назарий билимларини амалиёт орқали янада мустаҳкамланиши албатта, яқин келажакда ўз мевасини беради. Демоқчи бўлганимиз, бу қизнинг ишга олиниши очиқ мулоқотда берган таклиф билан боғлиқ эмас. Вилоят ҳокими ва жамоаси ҳар доим холис ОАВ учун очиқ ва ушбу очиқлик бўйича олиб борилаётган сиёсат ҳеч қачон ортга қайтмайди, — дейди Аҳрор Содиқов.
Изоҳ (0)