Argentinani mag‘lub etgan Saudiya Arabistoni terma jamoasi futbolchilariga avtomobil sovg‘a qilingani haqidagi xabarlar inkor etildi

Saudiya Arabistoni terma jamoasi JCH—2022 guruh bosqichi 1-turida Argentina ustidan 2:1 hisobida zafar quchgandi.

Shundan so‘ng saudiyalik futbolchilarning har biriga Rolls-Royce Phantom avtomobili va 2,5 million yevrodan mukofot berilishi haqida ma’lumot paydo bo‘ldi. Bu qaror Saudiya Arabistoni valiahd shahzodasi Muhammad bin Salmon tomonidan qabul qilingani aytilgandi.

Saudiya Arabistoni futbol federatsiyasi prezidenti Yosir al-Mishal futbolchilarga avtomobil sovg‘a qilinganini inkor etdi. Uning so‘zlariga ko‘ra, futbolchilar bonus pullariga ega bo‘lgan, biroq uning miqdori aniq aytilmagan.

“Yo‘q, yo‘q, yo‘q. Futbolchilarimiz yurt sha’nini g‘urur bilan himoya qildi. Tarixiy o‘yinda terma jamoa sharafini himoya qilish ular uchun sharaf va baxt. Bu mish-mishlar haqiqatga to‘g‘ri kelmaydi. Albatta, ularda bonus bor edi, lekin oddiy bonus. Bunday holatlar uchun bizda qoidalar mavjud.

Ular bonuslar uchun emas, mamlakat uchun o‘ynaydi. Tarix yaratish uchun o‘ynaydi. Futbolchilarning ko‘pchiligi Argentina ustidan qozonilgan g‘alabadan so‘ng mashhur bo‘ldi”, — dedi al-Mishal Marca nashriga bergan intevyusiga.

Saudiya Arabistoni C guruhida 3 ochko bilan 4-o‘rinni egallab, musobaqani tark etdi.