Аргентинани мағлуб этган Саудия Арабистони терма жамоаси футболчиларига автомобиль совға қилингани ҳақидаги хабарлар инкор этилди

Саудия Арабистони терма жамоаси ЖЧ—2022 гуруҳ босқичи 1-турида Аргентина устидан 2:1 ҳисобида зафар қучганди.

Шундан сўнг саудиялик футболчиларнинг ҳар бирига Rolls-Royce Phantom автомобили ва 2,5 миллион евродан мукофот берилиши ҳақида маълумот пайдо бўлди. Бу қарор Саудия Арабистони валиаҳд шаҳзодаси Муҳаммад бин Салмон томонидан қабул қилингани айтилганди.

Саудия Арабистони футбол федерацияси президенти Ёсир ал-Мишал футболчиларга автомобиль совға қилинганини инкор этди. Унинг сўзларига кўра, футболчилар бонус пулларига эга бўлган, бироқ унинг миқдори аниқ айтилмаган.

«Йўқ, йўқ, йўқ. Футболчиларимиз юрт шаънини ғурур билан ҳимоя қилди. Тарихий ўйинда терма жамоа шарафини ҳимоя қилиш улар учун шараф ва бахт. Бу миш-мишлар ҳақиқатга тўғри келмайди. Албатта, уларда бонус бор эди, лекин оддий бонус. Бундай ҳолатлар учун бизда қоидалар мавжуд.

Улар бонуслар учун эмас, мамлакат учун ўйнайди. Тарих яратиш учун ўйнайди. Футболчиларнинг кўпчилиги Аргентина устидан қозонилган ғалабадан сўнг машҳур бўлди», — деди ал-Мишал Marca нашрига берган интевюсига.

Саудия Арабистони C гуруҳида 3 очко билан 4-ўринни эгаллаб, мусобақани тарк этди.