Ukrainadagi jangovar harakatlar sur’ati pasaydi, deb ma’lum qildi AQSH Milliy razvedka boshqarmasi direktori Evril Xeyns. U ushbu dinamika yaqin kelajakda davom etishini prognoz qilmoqda.
“Biz mojaroning o‘ziga xos tarzda sekinlashuvini ko‘ryapmiz... va bu kelgusi oylarda davom etishi mumkinligini kutmoqdamiz”, — dedi Xeyns xonim Kaliforniyada Ronald Reygan milliy mudofaa forumidagi chiqishida.
AQSH razvedkasi ma’lumotlariga ko‘ra, Rossiya va Ukraina tomonlari qishdan keyingi qarshi hujumga tayyorgarlik ko‘rish maqsadida zaxiralarni qayta to‘ldirishga intilmoqda. “Rossiyaliklar bunga tayyor bo‘lish-bo‘lmasligiga shubha bilan qarayapmiz. Men ukrainaliklar haqida (ularning zaxiralarni to‘ldirishga tayyorligi haqida — “Daryo” izohi) ko‘proq optimistik o‘ylayman”, —deya qo‘shimcha qildi Amerika razvedkasi rahbari.
Xeyns xonimning fikricha, Rossiya prezidenti Vladimir Putinning Ukrainaga nisbatan siyosiy maqsadlari o‘zgarmagan, biroq razvedka tahlilchilari u qisqa muddatli harbiy maqsadlarni “keyinroq bu masalaga qaytsa bo‘ladi, degan fikr bilan vaqtinchalik kamaytirishi” mumkin, deb hisoblamoqda.
AQSH razvedkasi Rossiyaning harbiy zaxiralari, jumladan, aniq boshqariladigan o‘q-dorilari “juda tez” tugayapti, deb baholamoqda. Xeyns, shuningdek, KXDRdan Rossiyaga o‘q-dorilar yetkazib berilayotganini qayd etdi, biroq “ular kam” ekanini ta’kidladi, Eronni esa Rossiyai dronlar bilan ta’minlaganlikda yana bir bor aybladi. Shimoliy Koreya va Eron rasmiylari Rossiyaga qurol yetkazib berayotganini tan olmayapti.
Rossiya 24-fevraldan beri Ukrainada Vladimir Putin buyrug‘i bilan harbiy amaliyot o‘tkazmoqda. Sentabr oyi oxirida Rossiya Federatsiyasi Donetsk va Lugansk xalq respublikalari, Xerson va Zaporojye viloyatlarini anneksiya qildi.
Izoh (0)