Ijtimoiy tarmoqlarda Buxoro viloyati Vobkent tumanida yashagan fuqaro ichki ishlar binosida vafot etgani haqida xabarlar tarqaldi. Viloyat IIB axborot xizmati holatga aniqlik kiritdi.
Ma’lum qilinishicha, Jinoyat kodeksining 169-moddasi (o‘g‘rilik) 2-qismi “v,g” bandlari bilan qo‘zg‘atilgan jinoyat ishi bo‘yicha guvoh tariqasida jalb etilgan fuqaro Q.H. 28-noyabr kuni soat taxminan 15:00 da Buxoro shahri 4-sonli IIBga jinoyat ishi hujjatlari bilan tanishish uchun kelgan. Ammo tergovchining xizmat vazifasi bilan boshqa joyda bo‘lgani sababli IIB binosiga kirmasdan qaytib ketgan.
Fuqaroning IIB binosiga kirmasdan ketgan holati videotasvirga muhrlangan. Shundan so‘ng Q.H. taksi sifatida Matiz avtomashinasini to‘xtatib, uni Buxoro shahridagi “Fayziobod” jome masjidiga olib borishini so‘ragan. Yo‘lda fuqaroning sog‘lig‘i yomonlashib, og‘zidan ko‘pik chiqib, hushini yo‘qotgan. Haydovchi hushsiz yo‘lovchini tezkorlik bilan Buxoro shahri kasalxonasiga olib borgan.
Ko‘rsatilgan tibbiy muolajalarga qaramasdan, fuqaro shu kuni soat taxminan 21:00 da kasalxonaning jonlantirish bo‘limida vafot etgan. Sud-tibbiyot ekspertizasining birlamchi xulosasiga ko‘ra o‘lim tutqanoq sindromi, o‘pka va miyaga kislorod o‘tkir yetishmovchiligi oqibatida yuz bergan. Tekshiruv jarayonida murdaning badanida hech qanday tan jarohatlari aniqlanmagan. Holat shahar prokuraturasi tomonidan o‘rganilmoqda.
Mavzuga doir:
Izoh (0)