“Ko‘plab katta shaharlar qilgan xatoni takrorlayapmiz”. Doniyor G‘aniyev yo‘lni kengaytirish orqali tirbandliklarning oldini olib bo‘lmasligini aytdi

“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 9-soni mavzusi “Toshkent yashash uchun qulaymi?” bo‘lib, dastur mehmoni sifatida Qonunchilik palatasi deputati Doniyor G‘aniyev taklif etildi.

Dastur mehmoni nima uchun fuqarolarning mashina sotib olishga rag‘bati kuchli ekaniga to‘xtalib, buni faqat shoxona hayotga taqlid ramzi sifatida ko‘rmaslik kerakligini aytdi. Uning fikricha, odamlar asosan ehtiyoji borligi sabab sotib oladi mashinani.

Nega shuncha odam avtomobil haydayapti, sotib olishga majbur bo‘lyapti? Balki shoxonalik nuqtayi nazaridan emas, kundalik yumushlarini bajarish uchun yechim sifatida qarashar.

Chunki, birinchidan, bizda avtomobil haydash juda ham arzon (avtomobil qimmat, boshqa sabablarga ko‘ra). Ikkinchidan, shahardagi parkovka masalasi — tekin va hech qanday tartibga solinmagan. Uchinchisi, jamoat transportining deyarli falaj ahvolga kelib qolgani.

Bizga shaharning “A” nuqtasidan “B” nuqtasiga yetib olishimiz uchun samarali transport ta’minlanmagan. Shu uchun ko‘pchilik avtomobilda harakatlanadi.

Hozir biz bundan avval ko‘plab katta shaharlar qilgan xatoni takrorlayapmiz. Mantiqan o‘ylayapmizki, 4 ta qatorli mashina yo‘liga 100 ta avtomobil sig‘sa, shu yo‘lni 8 qatorli qilamiz va mashinalar sig‘imini 200 taga yetkazamiz, shu orqali oqim tirbandlikka uchramaydi. Lekin aslida bu orqali biz yana 100 ta mashinaning ko‘chada harakatlanishiga rag‘bat qilyapmiz. So‘nggida yana masalaning boshiga qaytib kelaveramiz, — deydi Doniyor G‘aniyev.