Yelizaveta II xarid qilish uchun doim ham vaqt topa olmagan, lekin ba’zi narsalarni shaxsan sotib olgan, bu vazifani o‘zidan boshqa hech kimga ishonmagan, deb yozadi Marie Claire.
Yangi yil yaqinlashgani sari ko‘pchilik xarid qilish haqida o‘ylay boshlaydi. Hatto bunday vaqtda qirolicha ham xaridni o‘zi amalga oshirgan. Buni bilgan odamlar hayron bo‘lishi mumkin. Yelizavetaning sobiq faxriy xizmatchisi va yaqin dugonasi Enn Glenkonner xonim o‘zining “Faxriy xizmatchi: toj soyasida mening g‘ayrioddiy hayotim” kitobida monarxning xarid borasidagi odatlarini so‘zlab berdi.
Glenkonner xonimning xabar berishicha, Yelizaveta II ning singlisi malika Margaret 1975-yilda Sidneyga qirollik tashrifi chog‘ida xarid qilish uchun do‘konlarga sayohat qilishni so‘raganida, avstraliyalik diplomat Roden Katler hayratda qolgan. Viktoriya xochining sohibi bu haqda shunday dedi: “Men qirollik a’zolari xarid qiladi, deb o‘ylamagan edim. Qirolichaning xarid qilganini hech qachon eshitmaganman va tasavvur ham qilolmayman”.
“Aslida, qirolicha do‘konlar aylangan. U Rojdestvo sovg‘alarini tanlash uchun Harrods’ga borardi. Qirollik yotoqxonasining boshqaruvchisi — onam hamisha u bilan birga buni amalga oshirgan”, — deydi qirolichaning faxriy xizmatchisi Enn xonim.
Bundan tashqari, Yelizaveta nafaqat qarindoshlariga sovg‘alarni o‘zi tanlagan, balki saroy xodimlari uchun ham hadyalar tayyorlagan. U har yili ularga tabriknoma va an’anaviy Rojdestvo pudingini taqdim etgan. Qirolicha Harrods yoki Fortnum and Meyson’dan 1500 dona Rojdestvo pudinglarini sotib olardi.
Shuningdek, monarxning otasi Jorj VI va uning bobosi Jorj V ham o‘z xodimlariga Rojdestvo sovg‘alarini sotib olgan. Qolaversa, bu Vindzorlar avlodlarida davom etib kelayotgan yagona an’ana emas. Misol uchun, marhum qirolicha har yili o‘z mehmonlarini Edvard VII davridagi taroziga chiqarib ko‘rardi.
Izoh (0)