Toshkentda boshlangan o‘ttiz mamlakat vakillari ishtirokidagi “Ipak yo‘lida turizm” xalqaro yarmarkasidan fotogalereya

Toshkent shahridagi “O‘zekspomarkaz” Milliy ko‘rgazmalar majmuasida “Ipak yo‘lida turizm” 27-Toshkent xalqaro turizm yarmarkasi o‘tkazilmoqda. 

“Daryo” fotomuxbiri Dilruh Isomiddinova yarmarkadan fotoreportaj tayyorladi.

“Bu turistik yarmarka chet mamlakatlaridan kelganlar uchun katta imkoniyat. Biz ham Tojikiston nomidan hunarmandchilik ishlari bilan qatnashyapmiz. O‘zbekistonga birinchi marotaba kelishim. Yaqin kunlarda Farg‘ona vodiysiga ham borishni rejalashtiryapman. Rishtonda kulolchilik, sopol buyumlar tayyorlash sohasi rivojlangan, u yerdagi hunarmandlar bilan tanishish va hamkorlikni yo‘lga qo‘yishni maqsad qildim”, — deydi Tojikiston xalq ustasi, kulol Fozil Nasirov.

Yarmarka 1995-yildan buyon har yili BMT Jahon sayyohlik tashkiloti (UNWTO) ko‘magida o‘tkazib kelinayotgan sayyohlik tadbiri bo‘lib, mazkur ko‘rgazma har yili butun dunyodan sayyohlik sohasining yuzlab mutaxassislarini o‘zida jamlab, xalqaro miqyosda rivojlantirishi uchun sharoit yaratadi.