Елизавета II харид қилиш учун доим ҳам вақт топа олмаган, лекин баъзи нарсаларни шахсан сотиб олган, бу вазифани ўзидан бошқа ҳеч кимга ишонмаган, деб ёзади Marie Claire.
Янги йил яқинлашгани сари кўпчилик харид қилиш ҳақида ўйлай бошлайди. Ҳатто бундай вақтда қиролича ҳам харидни ўзи амалга оширган. Буни билган одамлар ҳайрон бўлиши мумкин. Елизаветанинг собиқ фахрий хизматчиси ва яқин дугонаси Энн Гленконнер хоним ўзининг «Фахрий хизматчи: тож соясида менинг ғайриоддий ҳаётим» китобида монархнинг харид борасидаги одатларини сўзлаб берди.
Гленконнер хонимнинг хабар беришича, Елизавета II нинг синглиси малика Маргарет 1975 йилда Сиднейга қироллик ташрифи чоғида харид қилиш учун дўконларга саёҳат қилишни сўраганида, австралиялик дипломат Роден Катлер ҳайратда қолган. Виктория хочининг соҳиби бу ҳақда шундай деди: «Мен қироллик аъзолари харид қилади, деб ўйламаган эдим. Қироличанинг харид қилганини ҳеч қачон эшитмаганман ва тасаввур ҳам қилолмайман».
«Аслида, қиролича дўконлар айланган. У Рождество совғаларини танлаш учун Harrods’га борарди. Қироллик ётоқхонасининг бошқарувчиси — онам ҳамиша у билан бирга буни амалга оширган», — дейди қироличанинг фахрий хизматчиси Энн хоним.
Бундан ташқари, Елизавета нафақат қариндошларига совғаларни ўзи танлаган, балки сарой ходимлари учун ҳам ҳадялар тайёрлаган. У ҳар йили уларга табрикнома ва анъанавий Рождество пудингини тақдим этган. Қиролича Harrods ёки Fortnum анд Мэйсон’дан 1500 дона Рождество пудингларини сотиб оларди.
Шунингдек, монархнинг отаси Жорж VI ва унинг бобоси Жорж V ҳам ўз ходимларига Рождество совғаларини сотиб олган. Қолаверса, бу Виндзорлар авлодларида давом этиб келаётган ягона анъана эмас. Мисол учун, марҳум қиролича ҳар йили ўз меҳмонларини Эдвард VII давридаги тарозига чиқариб кўрарди.
Изоҳ (0)