O‘zbekistonda atmosfera bosimi ortishi tufayli hafta oxirlariga borib qon bosimidan shikoyat qiluvchilar soni sezilarli ko‘payishi mumkin.
“O‘zgidromet” mutaxassisi Erkin Abdulahatovning yozishicha, 3—4-dekabr kunlari respublika shimolida atmosfera bosimi 1045 gPa ga yaqin bo‘lishi mumkin. Bu normal atmosfera bosimi ko‘rsatkichidan 30-35 gPa ga ko‘p degani.
Yuqori atmosfera bosimi odam sog‘lig‘iga jiddiy ta’sir qiladi. Ayniqsa, u allergik, asmatik hamda qon bosimi xastaliklari bilan og‘riyotgan bo‘lsa. Bunday odamlar havodagi turli ko‘rinmas mayda zarrachalarga agressiv bo‘lishadi, aksiga olib, antisiklon tinch ob-havo sharoitini taqdim etib, bu kabi zarralar havoda ko‘p muddat muallaq saqlanishiga olib keladi.
Davomli yuqori bosimli antisiklon inson tanasida bosh va yurak og‘rig‘i, ish faoliyatining sustlashishi, umumiy zaiflik bilan namoyon bo‘ladi. Atmosfera bosimining ko‘tarilishi qondagi leykotsitlar sonini kamaytirish orqali organizmning himoya funksiyalariga salbiy ta’sir ko‘rsatadi. Bularning barchasi inson salomatligini sezilarli darajada og‘irlashtiradi. Organizmni turli yuqumli kasalliklarga moyil qilishi mumkin.
“Antisiklon ta’sirini yengillashtirish uchun ertalab tetiklashtiruvchi yengil dush qabul qilish, yengil gimnastika bilan shug‘ullanish hamda ovqatlanish ratsioniga kaliy moddasiga boy mevalarni qo‘shish va iste’mol qilish tavsiya etiladi. Insonning immun va asab tizimiga yukni kamaytirish, zo‘riqtirmaslik maqsadida, ozgina ma’lum muddat kundalik ish rejimini ham o‘zgartirish lozim. Iloji bo‘lsa, antisiklonning salbiy ta’sirini kamaytirish maqsadida, ko‘proq dam olgan ma’qul”, — deydi mutaxassis.
Uning qayd etishicha, O‘zbekistonda antisiklonlar 2,5 sutka uzog‘i bilan 3,5 sutkagacha davom etadi.
Izoh (0)