Toshkentda nogiron fuqaroni tepgan mahalla raisi jarimaga tortildi

Toshkent shahri Yakkasaroy tumanida fuqaroni tepgan mahalla raisi ishdan olingani haqida xabar berilgan edi. Shahar sudlari axborot xizmati holat yuzasidan qo‘shimcha ma’lumot taqdim etdi.

Unga ko‘ra, 29-noyabr kuni jinoyat ishlari bo‘yicha Yakkasaroy tumani sudida A.Q. (1963-yilda tug‘ilgan)ga oid ma’muriy huquqbuzarlik to‘g‘risidagi ish ko‘rib chiqilib, u Ma’muriy javobgarlik to‘g‘risidagi kodeksning 183-moddasi (mayda bezorilik) da nazarda tutilgan huquqbuzarlikni sodir etgan deb topildi.

Ish hujjatlariga ko‘ra, A.Q. 27-noyabr kuni soat 12:20 da Yakkasaroy tumani Boshliq mavzesi “Armug‘on” mahallasi KXAY ko‘chasi 9-uy oldida bo‘la turib, jamiyatda yurish-turish qoidalarini buzib, fuqaro I.P.ning orqa qismiga tepib, mayda bezorilik qilgan va ushbu holat internet tarmog‘i orqali keng muhokamalarga sabab bo‘lgan.

Sudning qarori bilan A.Q.ga bazaviy hisoblash miqdorining 3 baravari (900 ming so‘m) miqdorida jarima jazosi tayinlandi. Ushbu qaror ustidan qonunchilikda belgilangan tartib va muddatda Toshkent shahri sudiga apellyatsiya shikoyati (protesti) berilishi mumkinligi ma’lum qilindi.

Mavzuga doir:

• Toshkentda garajining buzilishiga qarshilik ko‘rsatgan ayolga qo‘pol munosabatda bo‘lgan IIB xodimiga xizmat tekshiruvi tayinlandi
• Qashqadaryoda 38 yoshli ayol va 19 yoshli qiz o‘zini poyezd tagiga tashlab, joniga qasd qildi. MFY raislaridan biri bu axborotni yashirib, “mahallaning siri” demoqda