Maxsus komissiya nega Qoraqalpog‘istondagi tartibsizliklar yuzasidan bor-yo‘g‘i 22 kishi sud qilinayotganiga tushuntirish berdi

Buxoro viloyati sudida Qoraqalpog‘iston Respublikasi sudining Jinoyat ishlari bo‘yicha sudlov hay’ati 2022-yilning 1—2-iyul kunlari Nukusda sodir bo‘lgan tartibsizliklarda qatnashganlikda gumonlangan 22 kishiga nisbatan qo‘zg‘atilgan jinoyat ishini ko‘rib chiqishni boshlagani xabar qilingandi. Maxsus komissiya sud jarayoniga oid noaniq holatga tushuntirish berdi.

Gap shundaki, Milliy gvardiya hamda Bosh prokuratura mas’ullarining iyul oyidagi ommaga e’lon qilgan ma’lumotlarida namoyishlardagi ishtiroki uchun 516 kishi qo‘lga olingani ma’lum qilingan edi. Ammo sud jarayonlari 22 kishi ustidan o‘tkazilmoqda.

Mustaqil komissiyaning ma’lum qilishicha, sud jarayonlarida 22 nafar sudlanuvchiga oid jinoyat ishi ko‘rib chiqilayotgan bo‘lsa, qo‘lga olinganlarning 107 nafari Komissiya tashabbusi bilan jamoat kafilligi va qamoq ehtiyot chorasi insonparvarlik tamoyili asosida uy qamog‘i tarzidagi ehtiyot chorasiga almashtirilishi orqali o‘z oilasi bag‘riga qaytarilgan. Qolgan shaxslar esa ma’muriy javobgarlikka tortilgan.

Sud majlisida kuzatuvchi sifatida ishtirok etgan Qoraqalpog‘iston Respublikasida yuz bergan holat va voqealarni o‘rganish hamda ular yuzasidan mustaqil tekshiruv o‘tkazish bo‘yicha komissiya a’zolarining ma’lum qilishicha, sud jarayonlari qonunchilikka muvofiq o‘tkazilmoqda.

Qoraqalpog‘istondagi tartibsizliklarga aloqadorlikda ayblangan fuqarolarning sud majlisi

Buxoro viloyati sudida Qoraqalpog‘iston Respublikasi sudining Jinoyat ishlari bo‘yicha sudlov hay’ati 2022-yilning 1—2-iyul kunlari Nukusda sodir bo‘lgan tartibsizliklarda qatnashganlikda gumonlangan 22 kishiga nisbatan qo‘zg‘atilgan jinoyat ishini ko‘rib chiqishni boshladi.

22 nafar sudlanuvchiga oid jinoyat ishi Qoraqalpog‘iston Respublikasi sudining jinoyat ishlari bo‘yicha sudlov hay’ati sudyasi Y.Abibullayev raisligida birinchi instansiya sudida ko‘rib chiqilmoqda.

Dastlabki tergov organining ayblov xulosasiga ko‘ra, sudlanuvchilar — D.Tajimuratov, L.Kallixanova, A.Turdanov, A. Smetullayev, D.Djiyemuratov, B.Kadirbergenov, B.Seytniyazov, A. Toqimbetov, Q.Seytimov, A.Nuratdinov, S.Medetov, N.Nayipov, P.Shamshetov, R.Bekmuratov, S.Kaipov, B.Genjebayev, S.Kalilayev, P. Nurniyazov, S.Kalimov, N.Sultamuratov, A.Temirxanov, A. Adilbekov Jinoyat kodeksining 11 ta moddasi bo‘yicha ayblanmoqda.