Amerika Qo‘shma Shtatlarining O‘zbekistondagi elchixonasi Qoraqalpog‘iston voqealariga aloqadorlikda ayblangan shaxslar ustidan bo‘lib o‘tayotgan sud jarayonlari yuzasidan bayonot bilan chiqdi.
Qayd etilishicha, AQSH sud jarayonlarini diqqat bilan kuzatmoqda. Mamlakat aybdorlarni qonuniy javobgarlikka tortish kerak, degan fikrda.
“Amerika Qo‘shma Shtatlari iyul oyida Qoraqalpog‘istonda sodir bo‘lgan fojiali voqealarga aloqadorlikda ayblangan 22 kishi ustidan bugun Buxoroda boshlangan sud jarayonlarini diqqat bilan kuzatib bormoqda. Biz hukumatni ijtimoiy shaffoflik bo‘yicha o‘z majburiyatlarini bajarishga va xavfsizlik kuchlari xodimlari O‘zbekiston qonunchiligini buzgan taqdirda ularni javobgarlikka tortishga undaymiz. Biz ombudsman boshchiligidagi tergov komissiyasini o‘z xulosalarini imkon qadar tezroq e’lon qilishga chaqiramiz”, — deyiladi xabarda.
Qoraqalpog‘istondagi tartibsizliklarga aloqadorlikda ayblangan fuqarolarning sud majlisi
Buxoro viloyati sudida Qoraqalpog‘iston Respublikasi sudining Jinoyat ishlari bo‘yicha sudlov hay’ati 2022-yilning 1—2-iyul kunlari Nukusda sodir bo‘lgan tartibsizliklarda qatnashganlikda gumonlangan 22 kishiga nisbatan qo‘zg‘atilgan jinoyat ishini ko‘rib chiqishni boshladi.
22 nafar sudlanuvchiga oid jinoyat ishi Qoraqalpog‘iston Respublikasi sudining jinoyat ishlari bo‘yicha sudlov hay’ati sudyasi Y.Abibullayev raisligida birinchi instansiya sudida ko‘rib chiqilmoqda.
Dastlabki tergov organining ayblov xulosasiga ko‘ra, sudlanuvchilar — D.Tajimuratov, L.Kallixanova, A.Turdanov, A. Smetullayev, D.Djiyemuratov, B.Kadirbergenov, B.Seytniyazov, A. Toqimbetov, Q.Seytimov, A.Nuratdinov, S.Medetov, N.Nayipov, P.Shamshetov, R.Bekmuratov, S.Kaipov, B.Genjebayev, S.Kalilayev, P. Nurniyazov, S.Kalimov, N.Sultamuratov, A.Temirxanov, A. Adilbekov Jinoyat kodeksining 11 ta moddasi bo‘yicha ayblanmoqda.
Izoh (0)