Bahodir Jalolov amerikalik bokschini 4-raundda nokautga uchratib, prof boksdagi 12-g‘alabasini qo‘lga kiritdi
Professional boksning super og‘ir vazn toifasida harakat qilayotgan Bahodir Jalolov (12-0, 12 KO) o‘zining navbatdagi jangini O‘zbekiston vaqti bilan 27-noyabr tongida o‘tkazdi.
Kaliforniyada (AQSH) bo‘lib o‘tgan jang oqshomida O‘zbekiston vakiliga amerikalik Kyortis Harper (14-9, 9 KO) raqib bo‘ldi.
Dastlabki ikki raund nisbatan sust tempda o‘tdi va unda tomonlar bir-birini o‘rganishga sarfladi. Uchinchi raundda Jalolov faollikni oshirdi va raund so‘ngida raqibini nokdaun holatiga tushirdi.
To‘rtinchi raundda ham Bahodir zarbalar seriyasini yo‘llashda davom etdi. Yana bir nokdaun holatidan keyin hakam texnik nokaut qayd etib, jangni to‘xtatdi.
Shu tariqa Jalolov professional boksdagi 12-g‘alabasini qo‘lga kiritdi. Ularning barchasida o‘zbekistonlik bokschi muddatidan avval g‘alabani qo‘lga kiritgan.
