Баҳодир Жалолов америкалик боксчини 4-раундда нокаутга учратиб, проф боксдаги 12-ғалабасини қўлга киритди

Профессионал бокснинг супер оғир вазн тоифасида ҳаракат қилаётган Баҳодир Жалолов (12-0, 12 КО) ўзининг навбатдаги жангини Ўзбекистон вақти билан 27 ноябрь тонгида ўтказди.

Калифорнияда (АҚШ) бўлиб ўтган жанг оқшомида Ўзбекистон вакилига америкалик Кёртис Ҳарпер (14-9, 9 КО) рақиб бўлди.

Дастлабки икки раунд нисбатан суст темпда ўтди ва унда томонлар бир-бирини ўрганишга сарфлади. Учинчи раундда Жалолов фаолликни оширди ва раунд сўнгида рақибини нокдаун ҳолатига туширди.

Тўртинчи раундда ҳам Баҳодир зарбалар сериясини йўллашда давом этди. Яна бир нокдаун ҳолатидан кейин ҳакам техник нокаут қайд этиб, жангни тўхтатди.

Шу тариқа Жалолов профессионал боксдаги 12-ғалабасини қўлга киритди. Уларнинг барчасида ўзбекистонлик боксчи муддатидан аввал ғалабани қўлга киритган.