Suriyadagi portlashda eronlik polkovnik Dovud Jafariy halok bo‘ldi. Bu haqda Eron Islom inqilobi posbonlari korpusiga tayanib, IRNA rasmiy axborot agentligi xabar berdi.
“Islom inqilobi posbonlari korpusining aerokosmik kuchlari yuqori martabali zobitlaridan biri, Suriyada harbiy maslahatchi bo‘lib ishlagan polkovnik Dovud Jafariy Damashq yaqinidagi yo‘lda portlash oqibatida shahid bo‘ldi”, — deyiladi xabarda.
Eron harbiylari Suriyada ittifoqchi mahalliy kuchlar bilan maslahatlashuvlar o‘tkazayotgan edi. Xabarga ko‘ra, ularning mashinasiga portlovchi moddalar o‘rnatilgan. Jafariy mashinaga o‘tirishi bilanoq bomba ishga tushgan.
Eron tomoni qotillikda “Isroil agentlari”ni aybladi hamda “soxta va jinoyatchi sionistik rejimdan, albatta, qasos olishini” ta’kidladi.
Quddus ayblovlarga javob bermadi. Ta’kidlanishicha, polkovnikning o‘limidan bir necha kun oldin Eronning kamikadze dronlari Ummon ko‘rfazidagi kemaga hujum qilgan. Kema bilvosita Isroilga tegishli bo‘lgan.
Islom inqilobi posbonlari korpusining dronlari va raketa qo‘shinlari dasturiga Dovud rahbarlik qilar edi. Uning o‘zi 2016-yilda Fors ko‘rfazida amerikalik dengizchilarni qo‘lga olish operatsiyasi ishtirokchisi sifatida tanilgan. Polkovnik unvoni unga o‘sha paytda berilgan.
Izoh (0)