Октябрь ойида Тошкентдаги ижара нархлари қандай ўзгаргани таҳлил қилинди. Бу ҳақда «Дарё»га Иқтисодий тадқиқотлар ва ислоҳотлар маркази хабар бермоқда.
Куз бошларида уй-жой ижарасига бўлган талабнинг кескин ўсиши қайд этилган бўлиб, бу октябрь ойида сотишнинг пасайишига хизмат қилди.
Маълумотларга кўра, Тошкент шаҳрида уй-жой олди-сотди ҳажмининг бироз камайгани кузатилди (-72 та).
Бунда пойтахтда октябрь ойида ўртача ижара нархи 17 фоизга ошиб, 1 квадрат метр учун 10,5 долларни ташкил этди, йил бошидан эса бу кўрсаткич 43 фоиздан зиёдга ортди.
Уй-жой ижара нархларининг энг юқори ўсиш суръатлари Олмазор — 49 фоиз, Яшнобод — 44 фоиз, Сергели — 34 фоиз ва Шайхонтоҳур — 33 фоиз туманларида қайд этилди.
Уй-жой учун энг юқори ижара нархлари Шайхонтоҳур, Миробод ва Яккасарой туманларида қайд этилди. Нисбатан арзон нархлар Учтепа, Сергели ва Бектемир туманларида кузатилди.
Умуман олганда, йил бошидан буён уй-жой сотиш ҳажмининг ўсиши ўтган йилнинг мос даврига нисбатан 9,2 фоизни ташкил этди.
Аввалроқ уйларнинг ижара нархи ошиши кутилаётгани, Ўзбекистонда аҳолининг инфляцион кутилмалари маълум қилингани ҳақида хабар берилганди.
Изоҳ (0)