Россия нефтига қарши санкциялар кучга киришидан икки ҳафта олдин Шимолий Европага етказиб бериш февраль ойи бошига нисбатан 90 фоиздан кўпроққа қисқарди — кунига 1,2 миллион баррелдан кунига 95 минг баррелгача. Бу ҳақда Bloomberg хабар бермоқда.
Маълумотларига кўра, Роттердам шаҳри Ўрта Ер денгизи ва Қора денгиз ҳавзаларидан ташқаридаги ягона Европа юк ташиш манзили бўлиб қолмоқда.
Литва, Франция ва Германия каби давлатлар бир неча ой олдин Россия нефтини импорт қилишни тўхтатган эди.
Сентябрь ойида улар орасига Польша қўшилди. Болтиқбўйи портларига юкланган нефтнинг тўртдан уч қисми ҳозир Осиёга мўлжалланган.
Ҳиндистон энергияни «имтиёзли давр» ёрдамида сотиб олмоқда — АҚШ, Буюк Британия ва Европа Иттифоқи чекловлар кучга киргунга қадар жўнатилган товарларни 19 январгача етказиб бериш шарти билан, 5 декабрда санкциялардан озод қилади.
18 ноябргача етти кун ичида Россиядан етказиб бериладиган нефть ҳажми кунига 2,57 миллион баррелгача қисқарди, бу тўққиз ҳафтадаги энг паст кўрсаткичдир.
Bloomberg маълумотларига кўра, Россиянинг нефть даромадлари январь ойи бошидан бери энг паст даражага тушиб кетди. Хитой, Ҳиндистон ва Туркияга етказиб бериш кунига рекорд даражадаги 2,45 миллион баррелга етган.
Аввалроқ G7 ва Австралия Россия нефтига қатъий нарх белгилашга келишиб олган эди. Улар 23 ноябрь куни батафсил маълумотларни эълон қилади. Россия нефтига нарх белгилаш 5 декабрга режалаштирилган.
Россия бундай механизмни жорий қилган мамлакатларга нефть етказиб бермасликка ваъда берди ва ишлаб чиқариш ҳажми камайишини истисно қилмади.
Изоҳ (0)