Keniyada dunyodagi eng keksa boshlang‘ich maktab o‘quvchisi hisoblangan 99 yoshli Prisilla Sitieney vafot etdi. Bu haqda BBC xabar berdi.
Marhumaning vafoti haqida nabirasi ma’lumot bergan. Sitieney maktabdagi darslarga qatnashganidan so‘ng, sog‘lig‘i bilan bog‘liq muammolar murakkablashgan. Ayol 12 yoshli sinfdoshlari bilan yakuniy imtihonlarga tayyorlanayotgan bo‘lgan.
Ayol haqida nimalar ma’lum?
Prisilla Sitieney inglizlar tomonidan bosib olingan va mustaqillik uchun kurashda omon qolgan Keniyada tug‘ilgan. Ayol 2010-yilda Leaders Vision tayyorgarlik maktabiga o‘qishga kirgan, bu paytda u 87 yoshda bo‘lgan. Bundan tashqari, u o‘zi yashaydigan Rift vodiysidagi Ndalat qishlog‘ida 65 yildan ortiq doya bo‘lib ishlagan.
2021-yilda u YUNESKOga yosh onalarni maktabga qaytishiga motivatsiya bermoqchiligini aytgan.
“Men nafaqat ularga, balki dunyoning boshqa burchaklarida maktabda o‘qimagan, bilimsiz qizlarga ham o‘rnak bo‘lmoqchi edim”, — degan u.
2015-yilda ayol jurnalistlarga maktabdagi darslari ortidan nihoyat o‘qish va yozishni o‘rganganini aytgan. Bungacha u bunday imkoniyatga ega bo‘lmagan. Ayol maktabga bormagan bolalarga, nima uchun bunday qilayotganlarini so‘ragan.
“Men adashgan, otasiz bolalarni ko‘chalarda aylanib yurganini ko‘raman. Ularni maktabga borishga ilhomlantirmoqchiman”, — degandi Prisilla Sitieney.
Eslatib o‘tamiz, 2019-yilda dunyodagi eng keksa ayol sifatida tan olingan yaponiyalik Kane Tanaka 19-aprel kuni 120 yoshida vafot etgandi.
Izoh (0)