19-noyabr — Xalqaro ayollar tadbirkorligi kuni. Dunyoning 144 mamlakatida nishonlanadigan ushbu tashabbusdan maqsad yangilikka intiluvchi, faol, o‘z g‘oyalariga ega va ularni amalga oshirishda izlanayotgan ayollarni qo‘llab-quvvatlashdir.
Yurtimizda 74 hududiy filial hamda 200dan ortiq mutaxassisga ega “Tadbirkor ayol” O‘zbekiston ishbilarmon ayollar assotsiatsiyasi bu sanani 6 yildan buyon nishonlab kelmoqda. 14—18-noyabr kunlari “O‘zbekistonda iqtisodiyotni raqamlashtirish va ayollar tadbirkorligini rivojlantirish” haftaligi doirasida ushbu sanaga doir bayram tadbirlari o‘tkazildi.
Asosiy e’tibor ayollar tadbirkorligiga raqamli biznesni joriy qilish, yangi trendlar bilan tanishish, tadbirkor ayollarning davlat organlari, jamoat tashkilotlari bilan samarali hamkorlik mexanizmlarini tatbiq etish, yangi hamkorlar topish va motivatsion ilhomlantirishga qaratildi.
Ta’kidlash joizki, so‘nggi ikki yarim yil ichida yuzdan ortiq loyiha natijalari asosida 29 701 nafar ayol tadbirkorlik ko‘nikmasiga ega bo‘ldi, ularning 9 774 nafari tadbirkorlikni boshladi. 11 658 nafar ayol ish bilan ta’minlandi. 14 426 ta yangi ish o‘rni yaratildi. 315 nafar malakali trener tayyorlandi. Tadbirlarda ayollar bilan bir qatorda davlat va jamoat tashkilotlari, xorijiy tashkilotlarning yurtimizdagi vakolatxonalari rahbarlari, xorijiy biznes ekspertlar, biznes uyushmalar, xalqaro va moliya institutlari qatnashdi.
Xususan, 14-noyabr kuni OAV vakillari, bloger va mustaqil nashr jurnalistlari ishtirokida Milliy matbuot markazida brifing o‘tkazildi. Shu kuni Buxoroda yosh tadbirkor ayollar uchun mahorat darslari, Qarshi shahrida biznes yuritish asoslari va xavfsiz migratsiya bo‘yicha o‘quv seminar, Samarqand shahrida “ANOR” Milliy ko‘rik tanlovining viloyat bosqichi g‘oliblarini taqdirlash marosimi bo‘lib o‘tdi.
Diqqatga sazovor yangiliklardan biri – 15-noyabrda Nukus shahrida “Qoraqalpoq Milliy etno-ovul” sayyohlik yo‘nalishi taqdimotining o‘tkazilishi bo‘ldi. Ushbu loyiha doirasida Qoraqalpog‘iston madaniyatini keng jamoatchilikka tanitish, turistlarni jalb etgan holda huddudning turistik infratuzilmasini rivojlantirish ko‘zda tutilgan.Xuddi shu sanada Navoiyda biznes yuritish asoslari va xavfsiz migratsiya bo‘yicha o‘quv seminar ham bo‘lib o‘tdi.
Haftalik doirasida ishbilarmon ayollarning san’at ustalari bilan ijodiy uchrashuvi, International Hotel Tashkent mehmonxonasida “O‘zbekistonda iqtisodiyotni raqamlashtirish va ayollar tadbirkorligini rivojlantirish” mavzusida xalqaro konferensiya, “ANOR-22” Milliy tanlovi g‘oliblarini taqdirlash marosimi o‘tkazildi.
Banklar assotsiatsiyasi hamkorligida 6-marotaba o‘tkazilayotgan O‘zbekiston ishbilarmon ayollar “ANOR” milliy ko‘rik-tanlovi hukumat, biznes va jamoatchilik doiralarining e’tirofiga sazovor bo‘lib, ayollar tadbirkorligini rivojlantirishning noyob mezoniga aylandi. Shu sababli tanlovning yakuniy qismi haftaning eng muhim voqealaridan biridir.
Bayram tadbirlari davomida “Tadbirkor ayol” O‘zbekiston ishbilarmon ayollar assotsiatsiyasi faoliyatini eng yaxshi yoritgani uchun OAV vakillari o‘rtasida o‘tkazilgan tanlov g‘oliblari taqdirlandi.
Reklama huquqi asosida.
Izoh (0)