19 ноябрь — Халқаро аёллар тадбиркорлиги куни. Дунёнинг 144 мамлакатида нишонланадиган ушбу ташаббусдан мақсад янгиликка интилувчи, фаол, ўз ғояларига эга ва уларни амалга оширишда изланаётган аёлларни қўллаб-қувватлашдир.
Юртимизда 74 ҳудудий филиал ҳамда 200дан ортиқ мутахассисга эга «Тадбиркор аёл» Ўзбекистон ишбилармон аёллар ассоциацияси бу санани 6 йилдан буён нишонлаб келмоқда. 14—18 ноябрь кунлари «Ўзбекистонда иқтисодиётни рақамлаштириш ва аёллар тадбиркорлигини ривожлантириш» ҳафталиги доирасида ушбу санага доир байрам тадбирлари ўтказилди.
Асосий эътибор аёллар тадбиркорлигига рақамли бизнесни жорий қилиш, янги трендлар билан танишиш, тадбиркор аёлларнинг давлат органлари, жамоат ташкилотлари билан самарали ҳамкорлик механизмларини татбиқ этиш, янги ҳамкорлар топиш ва мотивацион илҳомлантиришга қаратилди.
Таъкидлаш жоизки, сўнгги икки ярим йил ичида юздан ортиқ лойиҳа натижалари асосида 29 701 нафар аёл тадбиркорлик кўникмасига эга бўлди, уларнинг 9 774 нафари тадбиркорликни бошлади. 11 658 нафар аёл иш билан таъминланди. 14 426 та янги иш ўрни яратилди. 315 нафар малакали тренер тайёрланди. Тадбирларда аёллар билан бир қаторда давлат ва жамоат ташкилотлари, хорижий ташкилотларнинг юртимиздаги ваколатхоналари раҳбарлари, хорижий бизнес экспертлар, бизнес уюшмалар, халқаро ва молия институтлари қатнашди.
Хусусан, 14 ноябрь куни ОАВ вакиллари, блогер ва мустақил нашр журналистлари иштирокида Миллий матбуот марказида брифинг ўтказилди. Шу куни Бухорода ёш тадбиркор аёллар учун маҳорат дарслари, Қарши шаҳрида бизнес юритиш асослари ва хавфсиз миграция бўйича ўқув семинар, Самарқанд шаҳрида «АНОР» Миллий кўрик танловининг вилоят босқичи ғолибларини тақдирлаш маросими бўлиб ўтди.
Диққатга сазовор янгиликлардан бири – 15 ноябрда Нукус шаҳрида «Қорақалпоқ Миллий этно-овул» сайёҳлик йўналиши тақдимотининг ўтказилиши бўлди. Ушбу лойиҳа доирасида Қорақалпоғистон маданиятини кенг жамоатчиликка танитиш, туристларни жалб этган ҳолда ҳуддуднинг туристик инфратузилмасини ривожлантириш кўзда тутилган.Худди шу санада Навоийда бизнес юритиш асослари ва хавфсиз миграция бўйича ўқув семинар ҳам бўлиб ўтди.
Ҳафталик доирасида ишбилармон аёлларнинг санъат усталари билан ижодий учрашуви, International Hotel Tashkent меҳмонхонасида «Ўзбекистонда иқтисодиётни рақамлаштириш ва аёллар тадбиркорлигини ривожлантириш» мавзусида халқаро конференция, «АНОР-22» Миллий танлови ғолибларини тақдирлаш маросими ўтказилди.
Банклар ассоциацияси ҳамкорлигида 6-маротаба ўтказилаётган Ўзбекистон ишбилармон аёллар «АНОР» миллий кўрик-танлови ҳукумат, бизнес ва жамоатчилик доираларининг эътирофига сазовор бўлиб, аёллар тадбиркорлигини ривожлантиришнинг ноёб мезонига айланди. Шу сабабли танловнинг якуний қисми ҳафтанинг энг муҳим воқеаларидан биридир.
Байрам тадбирлари давомида «Тадбиркор аёл» Ўзбекистон ишбилармон аёллар ассоциацияси фаолиятини энг яхши ёритгани учун ОАВ вакиллари ўртасида ўтказилган танлов ғолиблари тақдирланди.
Реклама ҳуқуқи асосида.
Изоҳ (0)