15-noyabr kuni investitsiyalar va tashqi savdo vaziri Jamshid Xo‘jayevning Saudiya Arabistoni ACWA Power kompaniyasi boshqaruvi raisi Muhammad Abunayan bilan uchrashuvi bo‘lib o‘tdi. Bu haqda ITSV axborot xizmati xabar qildi.
Qayd etilishicha, unda qo‘shma loyihalarni amalga oshirishni jadallashtirish va qayta tiklanadigan energiya manbalarini rivojlantirish sohasidagi investitsiyaviy hamkorlikni kengaytirish masalalari muhokama qilingan.
Xususan, tomonlar Sirdaryo issiqlik elektr stansiyasi negizida quvvati 1500 MVt bo‘lgan kombinatsiyalashgan siklli issiqlik elektr stansiyasini qurish loyihasini amalga oshirilishini, shuningdek, Buxoro viloyatida quvvati 500 MVt bo‘lgan ikkita shamol elektr stansiyasini qurishga tayyorgarlik ko‘rish jarayonini o‘rganib chiqqan. Rejalashtirilgan chora-tadbirlarni amalga oshirishni jadallashtirish va barcha loyihalarni tezroq ishga tushirish bo‘yicha aniq amaliy chora-tadbirlar ko‘rish bo‘yicha kelishuvga erishilgan.
Kompaniya tomonidan O‘zbekistonda yangi yirik investitsiya loyihalarini amalga oshirishni nazarda tutgan holda investitsiyaviy hamkorlikni kengaytirish istiqbollari ko‘rib chiqilgan. Shu nuqtai nazardan, Qoraqalpog‘iston Respublikasida quvvati 1,5 GVt gacha bo‘lgan shamol elektr stansiyalarini qurish bo‘yicha yangi investitsiya loyihalarini ishlab chiqish imkoniyatlari to‘g‘risida fikr almashilgan.
Ushbu loyihalar O‘zbekiston hukumatining 2030-yilga borib shamol elektr stansiyalari tomonidan ishlab chiqarilayotgan elektr energiyasini 30 GVt ga yetkazishga qaratilgan mamlakat energetika balansini diversifikatsiya qilish dasturining bir qismi ekani ta’kidlangan. Ushbu loyihalarni amalga oshirish, shuningdek, chiqarilayotgan uglerod chiqindilarini yiliga 1,6 million tonnaga kamaytirishi va shu bilan 2031 yilgacha mamlakatning energiya quvvatining 40 foizini qayta tiklanadigan energiyaga o‘tkazish maqsadlariga hissa qo‘shishi kutilmoqda.
Muzokaralar yakunida qo‘shma loyihalarni jadal amalga oshirishga har tomonlama ko‘maklashish va yangi kelishuvlar hamda tashabbuslarni ishlab chiqishga o‘zaro intilish borligi bildirilgan.
Izoh (0)