Rossiya Mudofaa vazirligi 15-noyabr kuni Ukrainaning harbiy qo‘mondonlik va boshqaruv tizimiga hamda tegishli energetika obyektlariga aniq boshqariladigan qurollar bilan zarba berdi, deb tasdiqladi vazirlik matbuot kotibi Igor Konashenkov 16-noyabr kungi brifingda.
Konashenkovning so‘zlariga ko‘ra, barcha raketalar ko‘zlangan nishonlarga teggan. Zarbalar faqat Ukraina hududidagi nishonlarga va Ukraina—Polsha chegarasidan 35 kilometrdan kam bo‘lmagan uzoqlikdagi hududlarga berilgan.
Shu bilan birga, Mudofaa vazirligi vakili 15-noyabr kuni Rossiya harbiylari Kiyevga raketa hujumlari uyushtirganini rad etmoqda.
Kiyev rejimi tomonidan namoyish qilingan Ukraina poytaxtidagi turar joylar vayronalarining barchasi Ukraina qo‘shinlari tomonidan Kiyev ichida joylashgan ukrain va xorijiy havo mudofaa tizimlaridan otilgan zenit-raketalarning qulashi va o‘z-o‘zini yo‘q qilishi oqibatida bevosita yuzaga kelgan, — deya uning so‘zlaridan iqtibos keltirgan “Zvezda” telekanali.Shuningdek, Konashenkov Polshaga qulagan raketalar Ukraina harbiylariga tegishli S-300 tizimlari ekanini aytdi. Uning so‘zlariga ko‘ra, voqea joyidan olingan suratni tekshirayotib rossiyalik ekspertlar shunday xulosaga kelgan.
15-noyabr kuni kechqurun Pshevodov qishlog‘idan topilgan samolyot qoldiqlarining fotosuratlaridan Rossiya harbiy-sanoat kompleksi mutaxassislari bu Ukraina harbiy-havo kuchlarining S-300 havo mudofaa tizimi zenit raketasi qoldiqlari ekanini aniqladi, — ded u.Ukraina rasmiylari 15-noyabr kungi raketa hujumlarini urush boshlanganidan beri mamlakat energetika sektoriga berilgan eng katta zarba deb atadi. Kun davomida 15 ta energetika infratuzilmasi obyekti shikastlangan, yetti milliondan ortiq abonent elektr ta’minotisiz qolgan. Ukraina Qurolli kuchlari Rossiya harbiylari Ukrainadagi nishonlarni jami yuzga yaqin raketa bilan o‘qqa tutganini ma’lum qildi. Kiyev meri Vitaliy Klichko Rossiyaning hujumlari oqibatida shahardagi uchta turar joy binosiga zarar yetganini ma’lum qildi. Mahalliy aholidan biri ham halok bo‘lgani aytilmoqda.
O‘sha kuni kechqurun Polshaning Radio Zet radiosi Ukraina bilan chegaradan 8 km uzoqlikda, Lyublinsk viloyatidagi Pshevodov qishlog‘ida joylashgan don quritish inshootida portlash yuz berib, oqibatda ikki kishi halok bo‘lganini ma’lum qildi. Xabarlarga ko‘ra, Polshaga 2 ta raketa tushgan.
Bir qator mamlakatlar, jumladan Ukraina hukumati hodisada Rossiyani ayblamoqda. Polsha prezidenti Anjey Duda Varshavada raketalarni kim uchirgani haqida ma’lumot yo‘qligini ta’kidladi.
Pentagon matbuot kotibi Pet Rayder jurnalistlarga raketalarning kimga tegishli ekanini hali tasdiqlay olmasligini aytgan. AQSH prezidenti Jo Bayden ham ularning Rossiyadan uchirilgani hozircha rad etilayotgani haqida gapirdi.
Izoh (0)