AQSH Moliya vazirligi Rossiya Ukrainaga qarshi urushda foydalanayotgan dronlarni ishlab chiqarish va tashish uchun mas’ul Eron kompaniyalariga nisbatan sanksiyalar joriy qildi. Bu haqda AQSH moliya vazirligi matbuot xizmati xabar berdi.
Vazirlik ma’lumotlariga ko‘ra, dronlarni ishlab chiqarish bilan shug‘ullanuvchi Shahed Aviation Industries, shuningdek, ularni Rossiyaga yetkazib berishga aloqador Success Aviation Services FZC va Jet Global DMCC kompaniyalari AQSH sanksiyalari ostiga tushgan.
Bundan tashqari 2 nafar jismoniy shaxsga nisbatan ham sanksiyalar joriy etilgan. Amerika ma’lumotlariga ko‘ra, ular “Vagner” xususiy harbiy kompaniyasini Eron dronlari bilan ta’minlagan.
“AQSH Rossiyaning Ukrainaga asossiz bosqinini qo‘llab-quvvatlagan shaxslar va kompaniyalarga nisbatan sanksiyalar qo‘llashga qaror qilganini bir necha bor isbotlaganmiz. Bugungi chora-tadbirlar Rossiyaga Ukrainaning tinch aholisiga qarshi Eron dronlarini qo‘llashga imkon berganlarni javobgarlikka tortishni maqsad qilgan”, — dedi moliya vaziri Janet Yellen.
Rossiya Ukrainadagi urushda Eronda ishlab chiqarilgan Shahed-131 va Shahed-136 dronlaridan foydalanmoqda, Rossiya Qurolli kuchlari ularning nomini “Geran-1” va “Geran-2” deb o‘zgartirib olgan. Rossiya rasmiylari dronlarning Erondan olib kelinishini tan olmayapti.
Noyabr oyi boshida Eron tashqi ishlar vaziri Husayn Abdullohian Rossiyaga bir qancha dronlar yuborilganini tasdiqlab, bu urush boshlanishidan bir necha oy oldin sodir bo‘lganini aytdi.
Oktabr oyi o‘rtalarida Yevropa Ittifoqi Shahed Aviation Industries’ga qarshi sanksiyalar joriy qilib, kompaniya “Ukrainaning hududiy yaxlitligi, suvereniteti va mustaqilligiga putur yetkazuvchi yoki tahdid soluvchi harakatlarni moddiy qo‘llab-quvvatlashga javobgar ekanini” ma’lum qilgandi.
Avvalroq AQSH Safiran Airport Services kompaniyasiga nisbatan sanksiyalar joriy etgan edi, AQSH rasmiylariga ko‘ra, bu Rossiyaga Eron dronlarining yetkazib berilishi bilan bog‘liq.
Izoh (0)