«Дарё» нашри 14 ноябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Саида Мирзиёева Президент администрациясида шўъба мудири этиб тайинланди
Бугун 14 ноябрда Президент фармойиши билан Саида Шавкатовна Мирзиёева Президент администрацияси Ижро этувчи аппаратининг Коммуникациялар ва ахборот сиёсати бўйича шўъба мудири лавозимига тайинланди.
Таъкидланишича, ушбу шўъба янгидан тузилган бўлиб, администрация раҳбарининг жамоатчилик фикрини ўрганиш ва ахборот сиёсати учун масъул ўринбосари тизими таркибига киради. Шунингдек, Саида Мирзиёева ижтимоий соҳа, маданият ва таълим соҳаларидаги ислоҳотлар ижросининг боришини ҳам назорат қилади.
Владимир Зеленский Россия босқинидан озод қилинган Херсонга ташриф буюрди
Украина президенти Владимир Зеленский Херсонга ташриф буюрди. Бу ҳақда гувоҳларга таяниб, Reuters хабар бермоқда.
Нашрнинг ёзишича, у ерда Зеленский Украина тинчлик музокараларига тайёрлигини яна бир бор маълум қилган ва у ердаги ҳарбийларни нишон билан тақдирлаган.«Биз олға интиляпмиз ва тинчликка, бутун мамлакатимиз учун тинчликка тайёрмиз», — деган Зеленский.
Айни вазиятда Украина мудофаа вазири Қримнинг жангсиз қайтариб олинишига ишонч билдирган.Херсонда давом этаётган «барқарорлаштириш чоралари» ва миналарни зарарсизлантириш ишлари туфайли журналистларга шаҳарга кириш ҳозирча тақиқланган.
Бир қанча журналистлар, жумладан, CNN ва Sky News ғарбий телеканаллари Херсондан репортаж тайёрлаганидан сўнг, Украина ҳукумати уларни аккредитациядан маҳрум қилди.Эслатиб ўтамиз, ўтган ҳафта Россия Мудофаа вазирлиги Херсондан чекинаётгани ҳақида хабар берди.
11 ноябрь куни кечқурун Украина ҳарбийлари Херсон шаҳри ва унинг атрофидаги қишлоқларга кира бошлади. Уларни кутиб олиш учун минглаб аҳоли Украина байроқлари билан кўчага чиқди. Айни вазиятда ушбу ҳолат юзасидан Россия президенти матбуот котиби Дмитрий Песков журналистларга: "Биз буни изоҳсиз қолдирамиз. Бу Россиянинг ҳудуди эканини биласиз" дея маълум қилган.
Россияда Совет давридаги мактаб ўқувчиларини ҳарбий тайёрлаш дастури қайтарилди
Россияда 1993 йилда бекор қилинган Совет давридаги мактаб ўқувчиларини ҳарбий тайёрлаш дастури қайтарилди. Бу ҳақда Буюк Британия Мудофаа вазирлиги маълумот берди.Вазирлик эълон қилган ҳисоботга кўра, бу чора-тадбирлар бошқа давлатга қарши босқинчилик уруши фонида Россияда кўплаб «ватанпарварлар»ни шакллантириш учун зарур.
Ҳарбий тайёргарлик давомида бошқа нарсалар қатори Калашников автоматларидан фойдаланиш ҳам ўргатилиши маълум қилинган. Таҳлилчилар 2014 йилда Россия Қримга бостириб кирганидан кейин бу тренингни жонлантиришга ҳаракат қилинганини эслатди.
Ҳозирда ўқув дастури ишлаб чиқилмоқда ва 2022 йил охиригача якунланади. Кейин у тасдиқлаш жараёнидан ўтади», — дейилади Британия разведкаси ҳисоботида. Россия Мудофаа вазирлиги ушбу жараённи қўллаб-қувватлади ва ҳар ўқув йилида камида 140 соат ушбу машғулотга бағишланиши кераклигини таъкидлади.
«Мазкур машғулотлар ўқувчиларни ҳарбий ёшга етганда ҳарбий кўникмага эга бўлиш, уларнинг сафарбарлик ва ҳарбий хизматга шайлигини ошириш учун мўлжалланган бўлса керак», — дейди таҳлилчилар.
Bloomberg нашри аввалроқ Россияда совет даврларидан буён фойдаланилмаган бомбапаноҳлар яширинча текширилиб, янгиланаётганини хабар қилганди. Бундан ташқари, Россия ОАВлари Москвадаги ерости паркингларида ухлаш учун жойлар тайёрланиб, иситиш ускуналари ва аптечкалар ўрнатилаётгани ҳақида ёзганди.
Туркия портлаш юзасидан АҚШ томонидан билдирилган ҳамдардликни қабул қилишдан бош тортди
Туркия ички ишлар вазири Сулаймон Сойлу Истанбулдаги портлаш муносабати билан АҚШ томонидан билдирилган ҳамдардликни Анқара қабул қилишдан бош тортишини маълум қилди, деб ёзади CNN Turk. «Биз Америка элчихонасидан билдирилган таъзияни қабул қилмаймиз. Биз ҳеч кимга сотқинлик қилмаяпмиз, лекин бизга қилинаётган сотқинликка ортиқ чидаб туролмаймиз», — деди у ва Туркия ҳукумати «ҳужум қаерда мувофиқлаштирилганидан хабардор бўлганини» таъкидлади.
Аввалроқ вазир АҚШ Истанбулдаги теракт юзасидан билдирган расмий ҳамдардликни танқид қилган ва тез орада унга жавоб берилишини айтганди. «Менимча бугун АҚШ томонидан эълон қилинган ҳамдардликни қотилнинг воқеа жойига биринчилардан бўлиб етиб келишига қиёслаш керак. Ва бу таъзияга муносабат жуда аниқ бўлади. Буни яқин келажакда кўрасиз», — деган у.
Туркия президенти 12 ноябрь куни АҚШ президенти Жо Байденни Анқарада тақиқланган FETO ташкилоти раҳбари Фатхулла Гуленни Пенсильванияда яшириб ўтиришда айблади. Туркия ҳукумати Гуленни 2016 йилги давлат тўнтаришига уринишда асосий жавобгар деб ҳисоблайди, унинг ўзи буни рад этади. Гулен АҚШда яшайди, Туркия уни экстрадиция қилишни сўрамоқда, аммо Вашингтон буни амалга оширмаяпти.
Бундан ташқари, Туркия Швеция ва Финляндиянинг НАТОга қўшилишига розилик берганича йўқ. Эрдўғоннинг айтишича, бу мамлакатлар Туркияда террористик деб тан олинган ташкилотлар, хусусан, Курдистон ишчилар партияси иштирокчиларига бошпана берган.Истанбулдаги портлаш 13 ноябрь куни сайёҳлар орасида машҳур бўлган Истиқлол кўчасида юз берди. Олти киши ҳалок бўлиб, камида 81 киши жабрланди. Орадан вақт ўтиб, Туркия ИИВ портлашни содир этган шахс қўлга олинганини маълум қилди. Ички ишлар вазири портлаш ортида Курдистон ишчилар партияси тарафдорлари турганини маълум қилган.
Ўзбекистон энерготизимида оғир оқибатли «авария» – блекаут хавфи борлиги маълум қилинди.«Ҳар куни электр энергиясини тежаш кунини нишонлаяпмиз». Наманганликлар Энергетика вазирлигидан ҳафсаласи пир бўлганини айтмоқда
Наманганда электр таъминотида мунтазам узилишлар рўй бермоқда ва бу ҳолат аҳолининг ҳақли эътирозларига сабаб бўлмоқда. Бу ҳақда «Дарё» мухбири Азизбек Абдувалиев хабар берди.
Куз-қиш мавсуми кириб келганидан сўнг вилоятда электр энергияси бўйича мурожаатлар кўпайгани, фуқаролар диспетчерлик хизматлари ёки Call-марказларга қўнғироқ қилиб тушишга қийналаётганидан сўнг «Наманган ҳудудий электр тармоқлари» корхонаси томонидан ижтимоий тармоқларда «Наманган электр таъминоти» деб номланган гуруҳ очилган. 7,5 мингга яқин аъзоси бўлган ушбу гуруҳ вилоятнинг турли ҳудудларидан йўлланган мурожаат, шикоят ва саволларга кўмилиб кетган.
«11 ноябрь Халқаро электр энергиясини тежаш куни экан. Наманганда бу санани ҳар куни нишонлаяпмиз» дея киноя қилади фойдаланувчилардан бири.
Чортоқ туманидан ёзилган шикоятда эса: «Бизда тўрт соатлаб электр ёнмаяпти. Энг қизиғи, атрофимизда бешта санаторий бор. Дам олаётганлар республиканинг барча вилоятларидан келишади. Бу ‘свет’ ўчишининг охири борми ўзи?» дея мурожаат қилган. Яна бир фойдаланувчи эса «Электр таъминоти корхонасини UzAuto’дан нима фарқи бор? Сизлар ҳам олдиндан тўлов қилдириб исталган пайт ‘свет’ берасизлар, у ҳам нари борса 5 дақиқага» дея муносабат билдирган.
Миллий диспетчерлик маркази Наманган ҳудудий бўлими бошлиғи Муҳаммадали Ирисқуловнинг айтишича, совуқ кунлар бошланишидан аввал вилоятга кунига 13 миллион киловатт-соат электр энергияси етказиб берилган ва таъминотда деярли муаммо юзага келмаган. Ҳозирда бу кўрсаткич 15,5 миллион киловатт-соатга чиқарилган, бироқ эҳтиёжни қоплаб бўлмаяпти.
Ижтимоий тармоқ фаоли Шукуржон Тўхтасиновнинг айтишича, чиндан ҳам Уйчи тумани энг муаммоли ҳудудлардан бири бўлиб, баъзан туман электр тармоқлари корхонаси, ҳатто ҳокимликда ҳам «свет» йўқ. «Масаланинг яна бир томони бор. Аҳоли ва ижтимоий муҳим объектларга табиий газ етказиб берамиз деган баҳона билан Намангандаги барча метан газ заправкалар 12 соатлик чекловга ўтказилди. Лекин барибир аҳвол ўзгармади, аксинча баттар бўлди: аҳолида барибир газ йўқ, электр энергиясида доимий узилишлар, устига-устак автомобилларга газ тўлдириш шохобчаларидаги турнақатор навбатлар», — дея маълум қилган Шукуржон Тўхтасинов.
Аввалроқ Ўзбекистон энерготизимида оғир оқибатли «авария» – блекаут хавфи борлиги маълум қилинган.
Изоҳ (0)