Ukrainadagi Rossiya maxsus kuchlari 10 kilometrdan ortiq radiusdagi barcha elektron qurilmalarni o‘chirib qo‘yadigan qurollar bilan jihozlangan. Bu haqda The Times xabar berdi.
Ma’lum qilinishicha, elektromagnit impulsi bilan zarba berish Ukrainaning fuqarolik infratuzilmasini ishdan chiqarishi mumkin. Bu esa mamlakatning o‘zini himoya qilish qobiliyatiga jiddiy zarba beradi. Rossiya bunga erishish uchun Yerdan uchiriladigan va yadroviy bo‘lmagan elektromagnit qurollardan foydalanishi mumkin, deyiladi xabarda.
“Bunday qurollardan berilgan zarbalar o‘zidan deyarli iz qoldirmaydi. Shu uchun Rossiya undan foydalangan bo‘lishi mumkinligini tekshirish juda qiyin”, — dedi Qirollik birlashgan qurollanish institutining katta ilmiy xodimi Jastin Brok.
The Times’ga ko‘ra, Rossiya Ukrainada elektr va suv ta’minotini o‘chirishga harakat qilmoqda. Rossiyaning elektromagnit qurollaridan foydalanishi, ehtimol NATOning keskin javobini keltirib chiqaradi.
Elektron urushlar bo‘yicha ekspert Tomas Utingtonning aytishicha, G‘arb uzoq vaqtdan beri elektromagnit zarbasini yadroviy urushning debochasi sifatida ko‘rib kelgan va undan Ukrainada foydalanish NATO tomonidan xavfli yadroviy hujumlar sari qadam sifatida talqin qilinishi mumkin. Biroq, buning ehtimoli unchalik yuqori emas. Geosiyosat bo‘yicha tadqiqotchi direktor Jeyms Rojers fikricha, Putin tanaffusni xohlamoqda, elektromagnit hujum esa vaziyatni o‘zgartirishi mumkin.
Eslatib o‘tamiz, AQSh prezidenti Jo Bayden Rossiya rahbari Vladimir Putin taktik yadro qurollari, biologik yoki kimyoviy qurollardan foydalanish ehtimoli haqida gapirganda hazillashmasligini ma'lum qilgandi. U bu gapini Putinni yaxshi bilishi bilan izohlab ketgandi.
Izoh (0)