AQSH va NATO hukumati Ukraina armiyasi Rossiya qo‘shinlari tomonidan egallangan Xersonni ozod etganidan keyin Rossiya bilan muzokaralarni boshlashi mumkin, degan fikrda. Bu haqda Italiyaning La Repubblica gazetasi yozmoqda.
Nashr ma’lumotlariga ko‘ra, AQSH bunday xabarni Yevroittifoqqa uzatgan va endi bu fikrni Ukraina hukumatiga uqtirmoqda. Gazeta qayd etishicha, Vashington birinchi marta shunday taklifni ilgari surgan.
La Repubblica ta’kidlashicha, NATOning Bryusseldagi bosh qarorgohida aylanib yurgan so‘nggi tahliliy materiallarda aytilishicha, Rossiyaning Xersonda mag‘lub bo‘lishi harbiy, siyosiy va diplomatik nuqtai nazarlardan muhim bo‘lib, Moskva bilan ilk real muzokaralarni boshlash imkoniyatini ham beradi.
Noyabr boshrog‘ida Amerikaning The Washington Post gazetasi AQSH prezidenti ma’muriyati Ukraina hukumatiga murojaat qilib, Ukrainani qo‘llab-quvvatlayotgan mamlakatlar aholisini xavotirga solmaslik uchun Kiyev Moskva bilan muzokaralarga tayyorligini ommaga namoyish qilishni so‘ragani haqida xabar bergandi.
30-sentabr kuni Kremlda Donetsk va Lugansk xalq respublikalari hamda Ukrainaning Xerson va Zaporojye viloyatlari bosib olingan qismlarining “Rossiya tarkibiga kirishi” haqida shartnomalar imzolandi. O‘sha kuniyoq Ukraina hukumati NATOga qo‘shilish uchun ariza berdi. Zelenskiy o‘shanda Rossiya bilan muloqotga tayyorligini aytgan, lekin “boshqa prezident bilan” degan edi.
4-oktabr kuni esa Ukraina rasman Putin bilan har qanday muzokaralardan bosh tortdi.
Rossiya vakillari Ukraina bilan 2022-yil bahorida (Buchada tinch aholi o‘ldirilganidan keyin) uzilib qolgan muzokaralarni davom ettirishga tayyorligini ko‘p marta aytgan. Meduza manbalariga ko‘ra, Rossiya hukumati Ukraina bilan to‘la-to‘kis yarashuv sulhi haqida emas, balki 2023-yil fevral-martida yangi hujumga tayyorlanish uchun muvaqqat osoyishtalikdan foydalanish maqsadida vaqtinchalik o‘t ochishni to‘xtatish haqida kelishib olish istagida bo‘lgan.
Izoh (0)