«Гендер тенглигини таъминлашга оид турли стереотипларнинг олдини олишда ОАВ имкониятидан кенг фойдаланиш зарур» — Танзила Норбоева
Сенат раиси Танзила Норбоева Самарқанддаги иқтисодий форумда «Гендер тенглик, ёшлар, келажакка сармоя» мавзусида панел сессиясида БМТ сиёсатида гендер тенгликнинг ўрни ҳамда Ўзбекистонда соҳадаги норматив ҳужжатларни тартибга солиш ишлари ҳақида маълумот берди.
Хотин-қизлар ва эркаклар ўртасида тенгликни таъминлаш соҳасида БМТ фаолиятининг илк кунлариданоқ, қарийб 70 йил олдин гендер масалаларини асосий вазифаларидан бири сифатида белгилаган. Ташкилотнинг бош котиби Антониу Гутерриш ўз мурожаатларидан бирида: «Гендер тенглигига эришиш, хотин-қизларнинг ҳуқуқ ва имкониятларини кенгайтириш замонамизнинг тугалланмаган вазифаси ва бугунги кунда дунёдаги энг катта инсон ҳуқуқлари муаммосидир» деб масаланинг нақадар жиддий эканлигини таъкидлаган эди.Бугунги кунда норматив ҳуқуқий базани халқаро стандартлардан келиб чиққан ҳолда такомиллаштириш ишларини тизимли давом эттирамиз. Гендер экспертизасидан самарали фойдаланган ҳолда хотин-қизлар учун имконият ва кафолатларни янада кенгайтириш, иқтисодий тазйиқларнинг олдини олишга оид нормалар татбиқ этиб борилади.
Гендер тенглигини таъминлашга оид турли стереотипларнинг олдини олиш, унга оид меъёрларни аҳоли орасида кенг тарғиб қилишда оммавий ахборот воситалари, ижтимоий тармоқлар имкониятидан кенг фойдаланиш зарур.
Шунингдек, хотин-қизларни замонавий касбларга, айниқса, ахборот технологиялари, дастурлаш, онлайн тижорат қилиш соҳаларида ўқитиш, ушбу соҳада меҳнат фаолиятини амалга ошириш учун имкониятлар яратиш масалаларига эътибор қаратиш зарур.
Умуман олганда, давлат мутасадди ташкилотлари, фуқаролик жамияти институтлари, фаол жамоатчилик — барчамиз саъй-ҳаракатларимизни бирлаштириб, аёлларимизнинг иқтисодий имкониятларини кенгайтириш стратегиясини ишлаб чиқишимиз ва уни рўёбга чиқаришимиз зарур. Барча ҳамкорларимиз, жамиятимиз фаолларининг соҳадаги тизимли муаммоларни бартараф этиш юзасидан таклиф ва тавсияларини ҳамда бу борада янги лойиҳа ва ташаббусларини илгари суришда қўллаймиз, — дейди Сенат раиси.
