Якунланаётган ҳафтада Қорақалпоғистонда вазирлар «таъзирини еган» бўлса, Сурхондарё ва Қашқадарёда собиқ ҳокимлар қамалди. Наманган вилоятида эса мактаб ўқувчиси ўқитувчиси томонидан аёвсиз калтакланди. «Дарё» доимгидек ҳафта якунида ҳудудлардаги энг шов-шувли воқеаларни эсга олишда давом этади.
Наманган вилоятининг Давлатобод туманида 5-синф ўқувчиси синф раҳбари томонидан аёвсиз калтакланди. Мазкур воқеа жорий йил 13 октябрь куни Наманган шаҳрининг Давлатобод туманидаги 58-давлат ихтисослаштирилган умумтаълим мактабида рўй берган. Мактабнинг 5-синфида ўқийдиган қизлар синф раҳбарлари бўлган география фани ўқитувчисига синфдош бола устидан шикоят қилади. Педагог болага танбеҳ берган пайт орадан гап қочади. Шундан сўнг 27 яшар ўқитувчи йигит ҳиссиётлари ва қўлига эрк беради.
«Бўлиб ўтган воқеадан ўзим ҳам, мактаб жамоаси ҳам шок ҳолатида. Чунки ўқитувчи ҳеч қачон тажовузкор кайфиятда бўлмаган, ўша вазиятда ўзини бошқаролмагани учун минг пушаймон. Биз ўзимиз ҳам қаерда қандай хато ўтганини қайта-қайта таҳлил қиляпмиз. Ўша кундан бери тинчимиз бузилган, кимга нима дейишни билмаймиз. Чунки юз берган ҳолат педагогнинг касб этикасига мутлақо тўғри келмайди. Ўқувчи барибир ўқувчи, бола барибир бола. Шундай нуфузли даргоҳга ярашмайдиган ва мактаб тарихида умуман кузатилмаган ҳодиса юз берди. Бундан ниҳоятда афсусдамиз», — дейди директор.
Ҳолат юзасидан жиноят иши қўзғатилиб, жиноят иши қўзғатилган.
Нукус шаҳрида мактаб ўқувчилари иштирокида бўлиб ўтган шахмат бўйича Қорақалпоғистон биринчилиги ғолибларига майка ва футболка берилгани хабар берилди. Ҳолат ижтимоий тармоқларда кулги аралаш муҳокамаларни келтириб чиқарди. Шундан сўнг Қорақалпоғистон халқ таълими вазирлиги совриндорларга қўшимча тарзда электр печ совға қилди.
Қорақалпоғистонда шунингдек, тўйни тасвирга олишда ҳаётини хавф остига қўйган видеотасвирчилар ва автомобиль ҳайдовчиси жавобгарликка тортилди.
Республикада шунингдек, мазкур ҳафтада 3 нафар вазир таъзирини олди.
Дастлаб Қорақалпоғистон Республикаси транспорт вазири Султанбай Сапаровга нисбатан интизомий чора қўлланилди. У президент Шавкат Мирзиёев бошчилигида ўтказилган мажлис баённомасига мувофиқ Нукус шаҳри транспорт моделининг Бош режасини ишлаб чиқиш, шунингдек, Вазирлар Маҳкамаси қарорига мувофиқ 2022 йилда 50 дона автобус сотиб олиш, 1 дона логистика маркази ва 1 дона автостанция қуриш, 2 дона темир йўл вокзалини реконструкция қилиш бўйича топшириқларни бажармаган.
Шунингдек, Қорақалпоғистон халқ таълими вазири Ахмед Наримбетов ва мактабгача таълим вазири Гулзира Бахиевага ҳайфсан берилди.
Мазкур ҳафтада шунингдек Термиз шаҳрининг собиқ ҳокими Исроил Худойбердиев қамоққа олингани, у ва шериклари 14,8 миллиард сўмни ўзлаштиришда айбланаётгани хабар берилди. Кейинчалик Бош прокуратура собиқ ҳоким ва унинг шериклари давлат, жамият ва тадбиркорлар манфаатига салкам 36 миллиард сўм зарар келтирганини очиқлади. Собиқ ҳокимларнинг қамалиш воқеаси Қашқадарёда ҳам давом этиб, Қарши шаҳрининг собиқ ҳокими Жамшид Фозилов дастлаб давлат манфаатига 60 миллиард сўмдан ортиқ зарар етказишда айбланиб, унга нисбатан қамоққа олиш эҳтиёт чораси қўлланилгани ва Жиноят ишлари бўйича Қарши шаҳар суди қарори билан собиқ ҳокимга нисбатан қўлланилган қамоқ бекор қилиниб, Фозилов уй қамоғига олингани маълум бўлди. Қашқадарё прокуратураси суднинг мазкур қарорига протест келтириб, Жамшид Фозиловни қамоққа олиш тарзидаги эҳтиёт чорани ўз кучида қолдиришга эришди.
Изоҳ (0)