22-oktabr kuni soat 04:55 da Sirdaryo viloyati Malik aholi punktidagi Mudofaa vazirligi omborida yakka tartibda portlash sodir bo‘ldi. Favqulodda vaziyatlar vazirligi holat yuzasidan qo‘shimcha axborot berdi.
Qayd etilishicha, Mudofaa vazirligiga qarashli omborda yakka tartibda portlash sodir bo‘lishi oqibatida hududga yaqin joylashgan bir nechta aholi xonadonlari va do‘konlarning oynalari singan, binolarning ayrim yengil konstruksiyalariga ham zarar yetgan.
Halok bo‘lganlar yo‘q. Birlamchi ma’lumotlarga ko‘ra, shikastlanganlarning 11 nafari Sirdaryo tumani tibbiyot birlashmasiga jo‘natilgan. Ularga zudlik bilan birinchi yordam ko‘rsatilgan. 6 nafar bemorga ambulator yordam ko‘rsatilib javob berilgan.
Ayni vaqtda Favqulodda vaziyatlar davlat tizimiga kiruvchi kuch va vositalar jalb qilingan holda harbiy qism atrofida joylashgan mahallalar qamrab olinib, fuqarolar, tadbirkorlik subyektlari, korxona, muassasa va tashkilotlarga yetkazilgan zararni aniqlash hamda ularni qisqa muddatlarda bartaraf etish yuzasidan zarur choralar ko‘rilmoqda.
Izoh (0)