Qarshining sobiq hokimi Jamshid Fozilov taxminiy hisob-kitoblarga ko‘ra yo‘qotilgan 154 milliard so‘m pulning 60 milliarddan ko‘pini bir o‘zi “yegani”, shunga qaramay, unga nisbatan qo‘llanilgan qamoq ehtiyot chorasi bekor qilingani haqida xabar berilgandi. Viloyat prokuraturasining ma’lum qilishicha, sobiq rahbar yana qamoqqa olindi.

Qarshi shahri sudining 20-oktabrdagi ajrimiga ko‘ra, Jinoyat-protsessual kodeksning 242-2-moddasiga asosan viloyat prokuraturasi tomonidan sobiq hokim J.Fozilovga nisbatan kiritilgan qamoqqa olish tarzidagi iltimosnoma rad etilib, uy qamog‘i ehtiyot chorasi qo‘llash haqidagi ajrimiga nisbatan shahar prokurori tomonidan viloyat sudining jinoyat ishlari bo‘yicha apellyatsiya instansiyasiga apellyatsiya tartibida protest keltirilgan.

Viloyat sudining jinoyat ishlari bo‘yicha apellyatsiya instansiyasining 22-oktabrdagi ajrimiga asosan, shahar sudining sobiq hokim J.Fozilovga nisbatan kiritilgan qamoqqa olish tarzidagi iltimosnoma rad etilib, uy qamog‘i ehtiyot chorasi qo‘llash haqidagi ajrimi bekor qilinib, qamoqqa olish tariqasidagi ehtiyot chorasini qo‘llash haqidagi iltimosnoma qanoatlantirildi.

Viloyat prokurori tomonidan shahar sobiq hokimi J.Fozilov va boshqalarga nisbatan qo‘zg‘atilgan jinoyat ishi alohida nazoratga olingan bo‘lib, tergov natijalari yuzasidan ma’lumot beriladi.

Avvalroq Termizning sobiq hokimi va uning sheriklari davlat va jamiyat hamda tadbirkorlar manfaatiga 35,6 milliard so‘m zarar yetkazgani, shu sabab sobiq hokim va mas’ullar qamoqqa olingani haqida xabar berilgandi.