Jizzaxlik maktab o‘quvchisi Telegram messenjeri orqali jinoyat sodir etdi. Bu haqda Ichki ishlar vazirligi Kiberxavfsizlik markazi xabar bermoqda.
Qayd etilishicha, Surxondaryo viloyati Sherobod tumanida yashovchi fuqaro Z.J. ariza bilan murojaat qilib, Telegram messenjeridagi “Avtokredit bosh to‘lovsiz” guruhiga a’zo bo‘lgani, o‘zini guruh administratori deb tanishtirgan shaxs uning ishonchiga kirib, 3 yil muddatga 90 million so‘mga 16 foizdan Nexia-3 avtomashinani olib berishini va’da qilganini bildirgan. Shundan so‘ng kelishuv asosida boshlang‘ich 2 million 180 ming so‘m pulni qo‘lga kiritgach, yozishmalarni o‘chirib tashlanganini aytib, guruh administratoriga nisbatan qonuniy chora ko‘rishni so‘ragan.
Tezkor-qidiruv tadbirlari natijasida firibgarlik yo‘li bilan pullarni o‘zlashtirgan shaxs Jizzax viloyati Paxtakor tumanida yashovchi, 2006-yilda tug‘ilgan, 10-sinf o‘quvchisi M.D. ekani aniqlangan. Unga nisbatan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari olib borilmoqda.
Izoh (0)