Ba’zi filmlarni qayt-qayta tomosha qilsak ham zerikmaymiz. Qiziqarli sujet va iste’dodli aktyorlik shunchalik maftun etadiki, suratga olish guruhining ulkan ishlari haqida o‘ylamaymiz ham. Ammo ba’zida aktyor va aktrisalar o‘z vazifalarini a’lo darajada bajarish va tomoshabinlarni hayratda qoldirish uchun haqiqiy sinovlardan o‘tadi.
Natalya Seleznyova, “I operatsiyasi va Shurikning boshqa sarguzashtlari”
Ko‘pchilik Leonid Gayday komediyasidagi Lida ishtaha bilan sosiska yegan kadrni eslasa kerak. Mazkur kadr rejissor xohlaganidek chiqishi uchun aktrisa 20 ga yaqin sosiska yeyishiga to‘g‘ri kelgan. “Shundan keyin 2 yilgacha sosiska yemadim, ularga qaragim ham kelmasdi”, — deb eslaydi Natalya Seleznyova.
Natalya Tenyakova, “Sevgi va kabutarlar”
Shura kampir rolini o‘sha paytda 38 yoshda bo‘lgan Natalya Tenyakova ijro etgan. Aktrisa nafaqat kampir roliga rozi bo‘ladi, balki go‘zalligini ham qurbon qiladi: makiyaj tufayli uning yuz terisiga zarar yetadi.
Natalyani qari ko‘rsatish uchun uning yuzi maxsus plyonka bilan qoplangan bo‘lib, har suratga olish kunining oxirida ko‘chirib tashlash kerak edi. Qurigan plyonka terini qattiqlashtirganligi sababli aktrisaning yuziga ko‘plab ajin tushishiga sabab bo‘ladi.
Andrey Mironov, “Italyanlarning Rossiyadagi g‘aroyib sarguzashtlari”
Filmda ba’zi tryuklarni Mironovning o‘zi ijro etgan. U “Astoriya” mehmonxonasidan qochib ketish sahnasi suratga olinayotganda o‘t o‘chirish mashinasi zinapoyasidan “Jiguli” tomiga ko‘tarilib, gilamga tushadi.
Rejissor Eldar Ryazanov hatto aktyorni buzilgan ko‘prikning chetiga 30 metr balandlikka osib qo‘yishga ko‘ndirgan. Kadrda Andrey Mironovning haqiqiy his-tuyg‘ularini ko‘rish mumkin. Yana bir kadrda u sherni italiyaliklardan chalg‘itishi kerak edi. Aktyor xavfli sahnadan voz kechishi mumkin edi, lekin u obrazi ishonarli bo‘lishi uchun bu zarurligini tushunadi va qo‘rquvini yenga oldi.
Yuriy Yakovlev, “Taqdir hazili yoki qushdek yengil bo‘ling”
Yuriy Yakovlev qahramonining mashhur iborasi: “Oh, iliqqina ekan” improvizatsiya bo‘lgan. Gap shundaki, kinostudiyada issiq suv bilan bog‘liq muammolar yuzaga kelgan va aktyor yarim soatcha muzdek suv ostida turishiga to‘g‘ri kelgan. To‘satdan issiq suv kelganida, Yakovlev shu qadar hayratda qoladiki, so‘zlar o‘z-o‘zidan kela boshlaydi.
Ushbu kadrni suratga olish aktyorning sog‘lig‘iga ta’sir qiladi. Yakovlev qattiq shamollab qoladi: isitmasi ko‘tariladi va tomog‘i og‘riydi, natijada u 2 kungacha filmda suratga tusha olmaydi.
Oleg Basilashvili va Lyudmila Gurchenko, “Ikki kishilik vokzal”
“Ikki kishilik vokzal” (1983) melodramasining so‘nggi sahnalaridan birida bosh rol ijrochilari Oleg Basilashvili va Lyudmila Gurchenko qor kechib, yugurishlari kerak edi — mazkur kadr 28 daraja sovuqda suratga olingan va hatto aktyorlar hojatxonaga ham borolmagan.
Qalin qor tufayli kinokameralar uchun relslardan foydalanishning imkoni bo‘lmagan, shuning uchun operator uskunasi chanaga o‘rnatilgan, uni butun suratga olish guruhi, shu jumladan rejissor Eldar Ryazanov ham sudrab yurgan.
Spartak Mishulin, “Cho‘lning oq quyoshi”
Suratga olish maydonchasida Spartak Mishulinni boshigacha qumga ko‘mishadi. Aktyor quyosh tikkaga chiqib, qumni qizdirishini kutishi kerak edi. Mishulinning yonoqlari va peshonasiga murabbo surkalgan va u tomon ilonlar qo‘yib yuborilgan. Operator rejalashtirganidek, bu azoblarning barchasi filmga realizm qo‘shishi kerak edi.
Tanaffus paytida ham Spartak bir soat davomida issiq qumda jamoani kutadi, lekin bu safar soyabon ostida. Sahnani bir necha marta qayta suratga olishga to‘g‘ri kelgani bois suratga olish ishlari 3 kun davomida ertalabki 5 dan kechgacha davom etadi.
Dmitriy Iosifov, “Buratino”
Dmitriy Iosifov har kuni bir yarim soat yasama burun qo‘yishlarini kutish kerakligini eslaydi. “Avvaliga ular menga qandaydir rezina tayoq yopishtirishdi, keyin esa Italiyadan maxsus olib kelingan ko‘pikli plastmassaga o‘tishdi”, — deb eslaydi aktyor. Qolaversa, suratga olish jarayonida havo issiq bo‘lib, bolaning yuzi terlab, burni makiyaj ostida qattiq qichishgan.
Diqqat bilan qarasangiz, filmning boshida Buratinoning burni uzunroq bo‘lib, oxiriga kelib sezilarli darajada qisqarganini ko‘rish mumkin. Gap shundaki, bola bunday uzun burun tufayli zo‘rg‘a gapirardi. “Judayam uzun burun menga harakat qilishimga, jilmayishimga, qovog‘imni solishimga va shunchaki gaplashishga xalaqit berardi”, — deydi Dmitriy Iosifov intervyusida.
Izoh (0)