Баъзи фильмларни қайт-қайта томоша қилсак ҳам зерикмаймиз. Қизиқарли сюжет ва истеъдодли актёрлик шунчалик мафтун этадики, суратга олиш гуруҳининг улкан ишлари ҳақида ўйламаймиз ҳам. Аммо баъзида актёр ва актрисалар ўз вазифаларини аъло даражада бажариш ва томошабинларни ҳайратда қолдириш учун ҳақиқий синовлардан ўтади.
Наталя Селезнёва, «I операцияси ва Шурикнинг бошқа саргузаштлари»
Кўпчилик Леонид Гайдай комедиясидаги Лида иштаҳа билан сосиска еган кадрни эсласа керак. Мазкур кадр режиссёр хоҳлаганидек чиқиши учун актриса 20 га яқин сосиска ейишига тўғри келган. «Шундан кейин 2 йилгача сосиска емадим, уларга қарагим ҳам келмасди», — деб эслайди Наталя Селезнёва.
Наталя Тенякова, «Севги ва кабутарлар»
Шура кампир ролини ўша пайтда 38 ёшда бўлган Наталя Тенякова ижро этган. Актриса нафақат кампир ролига рози бўлади, балки гўзаллигини ҳам қурбон қилади: макияж туфайли унинг юз терисига зарар етади.
Наталяни қари кўрсатиш учун унинг юзи махсус плёнка билан қопланган бўлиб, ҳар суратга олиш кунининг охирида кўчириб ташлаш керак эди. Қуриган плёнка терини қаттиқлаштирганлиги сабабли актрисанинг юзига кўплаб ажин тушишига сабаб бўлади.
Андрей Миронов, «Итальянларнинг Россиядаги ғаройиб саргузаштлари»
Фильмда баъзи трюкларни Мироновнинг ўзи ижро этган. У «Астория» меҳмонхонасидан қочиб кетиш саҳнаси суратга олинаётганда ўт ўчириш машинаси зинапоясидан «Жигули» томига кўтарилиб, гиламга тушади.
Режиссёр Элдар Рязанов ҳатто актёрни бузилган кўприкнинг четига 30 метр баландликка осиб қўйишга кўндирган. Кадрда Андрей Мироновнинг ҳақиқий ҳис-туйғуларини кўриш мумкин. Яна бир кадрда у шерни италияликлардан чалғитиши керак эди. Актёр хавфли саҳнадан воз кечиши мумкин эди, лекин у образи ишонарли бўлиши учун бу зарурлигини тушунади ва қўрқувини енга олди.
Юрий Яковлев, «Тақдир ҳазили ёки қушдек енгил бўлинг»
Юрий Яковлев қаҳрамонининг машҳур ибораси: «Оҳ, илиққина экан» импровизация бўлган. Гап шундаки, киностудияда иссиқ сув билан боғлиқ муаммолар юзага келган ва актёр ярим соатча муздек сув остида туришига тўғри келган. Тўсатдан иссиқ сув келганида, Яковлев шу қадар ҳайратда қоладики, сўзлар ўз-ўзидан кела бошлайди.
Ушбу кадрни суратга олиш актёрнинг соғлиғига таъсир қилади. Яковлев қаттиқ шамоллаб қолади: иситмаси кўтарилади ва томоғи оғрийди, натижада у 2 кунгача фильмда суратга туша олмайди.
Олег Басилашвили ва Людмила Гурченко, «Икки кишилик вокзал»
«Икки кишилик вокзал» (1983) мелодрамасининг сўнгги саҳналаридан бирида бош рол ижрочилари Олег Басилашвили ва Людмила Гурченко қор кечиб, югуришлари керак эди — мазкур кадр 28 даража совуқда суратга олинган ва ҳатто актёрлар ҳожатхонага ҳам боролмаган.
Қалин қор туфайли кинокамералар учун рельслардан фойдаланишнинг имкони бўлмаган, шунинг учун оператор ускунаси чанага ўрнатилган, уни бутун суратга олиш гуруҳи, шу жумладан режиссёр Элдар Рязанов ҳам судраб юрган.
Спартак Мишулин, «Чўлнинг оқ қуёши»
Суратга олиш майдончасида Спартак Мишулинни бошигача қумга кўмишади. Актёр қуёш тиккага чиқиб, қумни қиздиришини кутиши керак эди. Мишулиннинг ёноқлари ва пешонасига мураббо суркалган ва у томон илонлар қўйиб юборилган. Оператор режалаштирганидек, бу азобларнинг барчаси фильмга реализм қўшиши керак эди.
Танаффус пайтида ҳам Спартак бир соат давомида иссиқ қумда жамоани кутади, лекин бу сафар соябон остида. Саҳнани бир неча марта қайта суратга олишга тўғри келгани боис суратга олиш ишлари 3 кун давомида эрталабки 5 дан кечгача давом этади.
Дмитрий Иосифов, «Буратино»
Дмитрий Иосифов ҳар куни бир ярим соат ясама бурун қўйишларини кутиш кераклигини эслайди. «Аввалига улар менга қандайдир резина таёқ ёпиштиришди, кейин эса Италиядан махсус олиб келинган кўпикли пластмассага ўтишди», — деб эслайди актёр. Қолаверса, суратга олиш жараёнида ҳаво иссиқ бўлиб, боланинг юзи терлаб, бурни макияж остида қаттиқ қичишган.
Диққат билан қарасангиз, фильмнинг бошида Буратинонинг бурни узунроқ бўлиб, охирига келиб сезиларли даражада қисқарганини кўриш мумкин. Гап шундаки, бола бундай узун бурун туфайли зўрға гапирарди. «Жудаям узун бурун менга ҳаракат қилишимга, жилмайишимга, қовоғимни солишимга ва шунчаки гаплашишга халақит берарди», — дейди Дмитрий Иосифов интервьюсида.
Изоҳ (0)