“Yalindik, yolvordik, lekin ular qo‘limizdagi hamma narsani tortib olishdi”. Yulduz Rajabova onasi bilan bog‘liq ayanchli voqea haqida so‘zlab berdi (video)

Aktrisa Yulduz Rajabova Turkiyaning “Hurriyat” nashri YouTube kanaliga bergan intervyusida bolaligida boshidan o‘tgan qiyin kunlar haqida so‘zlab berdi.

“Onam bozorda kitob sotardi. Men ham maktabdan so‘ng onamning yoniga borib, unga yordam berardim. Kitoblarni birgalikda sotardik. Bir kun bozorga tekshiruvchilar keldi. Bizda ruxsatnoma bor edi, biroq uning amal qilish muddati biroz o‘tgandi. Toshkentda kelgan tekshiruvchilar qo‘limizda nima bo‘lsa, hammasini bizdan tortib olishdi. Kitob, daftar, qalam, ruchka — hammasidan ayrildik. O‘sha kuni onamning yuz ifodasini, nimalar his etganini juda yaxshi xotirlayman. Bir farzand o‘laroq onangga yordam bera olmaslik, juda ham og‘ir. Bu kun hech qachon esimdan chiqmaydi. Biz u insonlarga yalindik, yolvordik, ammo afsuski hech qanday natija bo‘lmadi. Undan so‘ng oyoqqa qalqish juda qiyin bo‘ldi. Onam katta qarz ko‘tarib, ishini noldan boshladi. Qarzlarni sekin-asta uzib, oyoqqa turdik”,  — deya xotirlaydi Yulduz Rajabova.

Aktrisa, shuningdek, yaqinda o‘z mehnati evaziga poytaxtdan uy xarid qilgani hamda bundan eng ko‘p onasi xursand bo‘lgani haqida ham so‘zlab berdi.

“Yaqinda yaxshi bir uy oldim. Onam ‘O‘tgan yaxshi yomon kunlarimiz uchun, aynan ushbu taqdir yo‘lini yashab o‘tganimiz uchun shukr’, dedilar”, — deydi aktrisa.

Mavzuga doir: Yulduz Rajabova davlat rahbari bilan muloqoti haqida: “Prezident e’tirofi o‘zimga bo‘lgan ishonchimni kuchaytirdi”