Тошкент шаҳрида 17 октябрь куни чанг тўзони кузатилди. Шу куни пойтахт дунё рейтингида ҳавоси энг ифлос шаҳар сифатида биринчи ўринга чиққан. Бу каби ҳолат 2021 йил ноябрь ойида ҳам кузатилган эди.
Чанг бўрони ҳақида фикрларни билиш мақсадида «Дарё» мухбири аҳолининг айрим вакиллари орасида кичик сўровнома ўтказди.
Фикр билдирганлардан бири ҳавонинг ифлосланишига инсонларнинг ўзи сабаб бўлаётганини айтиб ўтди. «Экологияга эътибор йўқ. Тозаликка умуман риоя қилинмаяпти. Шаҳар борган сари ифлосланяпти. Одамлар ўзини атрофини тоза тутмайди. Биринчи ва энг асосий сабаби инсонларнинг ўзи», — дейди у.
Бекатда автобус кутаётган қизнинг сўзларига кўра, ҳавода чанг миқдорининг ортишига дарахтлар камлиги, борлари ҳам кесиб ташланаётгани сабаб бўлмоқда.
«Тошкентда ҳаво ифлосланишига сабаб транспорт кўп. Ишлаб чиқариш натижасида заводлар кўплаб тутун чиқаради. Заҳарли ҳавони ютадиган дарахтлар ҳам камайиб кетган. Одам кўп, дарахт кам», — дейди суҳбатдош.
Яна бир иштирокчи чанг тўзонига охирзамон аломати сифатида қарашини таъкидлади. «Охирзамон келяпти. Бунинг аломатлари. Машиналар ва техника кўп. Ишлаб чиқариш кўпайяпти. Одамлар заҳарланяпти», — дейди у.
Изоҳ (0)