Тошкент шаҳаридаги 6 гектар ер майдонида жойлашган собиқ Астрономия парки ўрнида янги боғ қурилади. Бу ҳақда Норматив-ҳуқуқий ҳужжатлар лойиҳалари муҳокамаси порталига жойлаштирилган Вазирлар Маҳкамаси қарорида айтиб ўтилган.
Порталга 4 октябрь куни Тошкент шаҳрида замонавий гул боғини ташкил этиш юзасидан Вазирлар Маҳкамаси қарори лойиҳаси муҳокамага қўйилган.
Унда айтилишича, Тошкент шаҳари Юнусобод туманидаги 6 гектар ер майдонида жойлашган собиқ Астрономия парки ўрнида замонавий гул боғи қурилади.
Боғини барпо этиш лойиҳаси очиқ танловда аниқланади. Танлов ғолибига ҳудудда боғини барпо этиш ва сақлаш мажбурияти билан 30 йилга ижарага берилади. Ижара муддати тугаганидан сўнг боғ давлатга ўтади.
Қурилиш ва ободонлаштириш ишлари танлов ғолибининг ўз ва жалб қилинган маблағлари ҳисобидан 2023 йилнинг II чорагида тугалланиши режалаштирилмоқда.
Ҳудуд Тошкент шаҳар ҳокимлиги томонидан хатловдан ўтказилади. Бунда хусусий мулклар мавжуд бўлган тақдирда, уларнинг эгаси билан келишиб, компенсация бериш кўзда тутилган.
Муҳокама 19 октябрь куни тугайди.
Изоҳ (0)