“Real” “Oltin to‘p”lar soni bo‘yicha “Barselona”ning rekordiga yetib oldi

“Real” hujumchisi Karim Benzema 2022-yilgi “Oltin to‘p” sovriniga ega chiqdi.

2013-yildan beri “Real” vakillari olti marta ushbu individual sovrinni qo‘lga kiritdi. Bu vaqt oralig‘ida to‘rt bor Krishtianu Ronaldu sovrindor bo‘lgan bo‘lsa, Luka Modrich va Karim Benzemaga bir martadan “Oltin to‘p” topshirilgan.

Qayd etish kerak, so‘nggi to‘qqiz yilda “Real” futbolchilaridan tashqari faqat Lionel Messi “Oltin to‘p”ni qo‘lga kiritgan. 2015 va 2019-yilda “Barselona” safida, 2021-yili esa “PSJ” futbolchisi sifatida sovringa ega chiqqan. 2020-yilda esa sovrin hech kimga topshirilmagan.

“Real” futbolchilari umumiy hisobda 12-marta “Oltin to‘p”ga loyiq ko‘rildi. Bu borada madridliklar “Barselona”ning rekord natijasiga tenglashib oldi.

Benzemada avval Raymon Kopa, Alfredo Di Stefano (2 marta), Luish Figu, Ronaldo, Fabio Kannavaro, Krishtianu Ronaldu (4) va Luka Modrich “Real” safida to‘p surayotgan vaqtida ushbu sovringa ega bo‘lgan. Zinedin Zidan, Maykl Ouen va Kaka kabi “Oltin to‘p” sohiblari “Real”ga sovrinni qo‘lga kiritib bo‘lgandan keyin kelgan.