Жо Байден президентлик даврининг чорак қисмини ўз иш жойидан узоқда ўтказган. Бу борада у Трампни ҳам ортда қолдирди

АҚШ президенти Жо Байден ўз лавозимига киришганидан буён вақтининг чорак қисмидан кўпини Делавердаги иккита қароргоҳидан бирида ишлаб ўтказган, бу собиқ президент Дональд Трампнинг Мар-а-Лагодаги уйига қилган сафарларидан ҳам кўпроқ демакдир. Бу ҳақда Daily Mail ёзмоқда.

16 октябрь, якшанба ҳолатига, 174 кун ичида президент Байден Делаверга 55 марта сафар қилган.

Ўз она штатига сафарлардан ташқари, Байден Мериленддаги президент қароргоҳига 19 марта бориб, 64 кунини ўша ерда ўтказган. Бу рақамлар шуни билдирадики, Байден бўш вақтини Оқ уйдан узоқда ўтказиш бўйича ўзидан аввалги барча президентлар, шу жумладан, Трампни ҳам ортда қолдирган.

Трамп дам олиш кунлари тез-тез Вашингтондан узоқда, хусусан, Нью-Жерси ва Флоридадаги курортларда жойлашган шахсий қароргоҳларида бўлгани учун кўп танқидларга учраган эди. У ўз президентлигининг худди шунча даврида Флорида ва Нью-Жерсидаги уйларида жами 135 кун, Кемп-Дэвиддаги ретритда эса 23 кун ўтказган.

Ўз президентлигининг икки йилдан камроқ қисми мобайнида Делавер ва Мерилендда 236 кун бўлиш — анча катта муддат, дейилади хабарда.

Жорж Буш президентлик лавозимида ўтказган 8 йиллик умрининг 490 кунини Техасдаги ранчосида ўтказган, Роналд Рейган эса Калифорниядаги ранчосида иккита муддатининг 349 кунини ўтказган.

Агар Байден шу суръатда давом этса, Оқ уйдан узоқда вақт ўтказиш бўйича иккита эмас, битта муддатнинг ўзидаёқ кичик Буш ва Рейганни ортда қолдиради, дейилади хабарда.

АҚШ президенти дам олиш кунлари Делаверга кетган пайтда муҳим янгиликлар пайдо бўлса, одатда Оқ уй Байден Вашингтондан узоқда туриб бўлса ҳам амалга оширган қўнғироқлар қайд этилган пресс-релизларни тарқатади.

«Ҳозир 1922 йил эмас, 2022 йил. Мамлакатнинг қолган қисми уйидан ишлаётган пайтда, АҚШ президенти ҳам шундай қилолади», — деди Жо Байденнинг рафиқаси Жилл Байденнинг собиқ матбуот котиби Майкл ЛаРоса.

«У дам олиш кунлари жисмонан Оқ уйда бўлмаса, демак ишламаяпти, деб ўйлаш бироз эскича қарашлар эмасми?» — деди ЛаРоса.

Август ойида Байден лавозимига киришганидан буён 228 кун таътилда бўлгани хабар берилганди.