Vashingtonda 7-sentabrdan 4-oktabrga qadar mahalliy tadbirkorlardan tashkil etilgan o‘n kishilik guruh “Xalqaro ta’lim bo‘yicha Amerika kengashlari” tomonidan AQSHda amalga oshirilayotgan Uzbekistan Business Leaders (UBL) dasturi doirasidagi o‘quvda ishtirok etdi, deb xabar bermoqda “Dunyo” axborot agentligi.
Qayd etilishicha, dastur doirasida ishtirokchilar AQSH kompaniyalari, nodavlat notijorat tashkilotlari va davlat idoralarida, Vashington, Ostin, Texas va Kaliforniyaning San-Diyego shaharlarida mehmonxona biznesi, IT va innovatsiyalar, inklyuziv ta’lim, kichik va o‘rta korxonalarni qo‘llab-quvvatlash, mebel ishlab chiqarish kabi sohalarda individual amaliyotni o‘tagan.
Mamlakatning AQSHdagi elchisi Javlon Vahobov AQSH hududlariga tashriflari va fuqarolar uchun treninglar yakunlari bo‘yicha dastur ishtirokchilari bilan uchrashuv o‘tkazgan, uning doirasida UBL kursini tamomlaganlik sertifikatlarini topshirgan.
Tadbirkorlarning aytishicha, ushbu o‘quvlar unumli va juda foydali bo‘lgan. Amaliyot AQSHda tadbirkorlik faoliyatining zamonaviy metodologiyalarini o‘rganish, bilim va ko‘nikmalarni oshirish, biznesning ayrim yo‘nalishlari bo‘yicha amaliy tajriba orttirish, hamkorlikdan manfaatdor amerikalik hamkorlar bilan bevosita aloqalarni o‘rnatish imkonini bergan.
Ma’lumot uchun, UBL dasturi AQSHning O‘zbekistondagi elchixonasi tomonidan moliyalashtiriladi va Xalqaro ta’lim bo‘yicha Amerika kengashlari tomonidan boshqariladi. Unga biznes, tadbirkorlik, ijtimoiy tadbirkorlik va innovatsiyalar bilan shug‘ullanuvchi 22 yoshdan 40 yoshgacha bo‘lgan mutaxassislar jalb etiladi. Dastur doirasida ishtirokchilar turli tijorat va notijorat tashkilotlarida, universitet biznes bo‘limlarida va tegishli davlat idoralarida ixtisoslashtirilgan professional amaliyot o‘tash uchun AQSHga taklif etiladi. 2018-yili O‘zbekistonda Amerika kengashlari faoliyati tiklanganidan so‘ng UBL ishtirokchilarining ushbu guruhi uchinchisi bo‘ldi. Birinchi guruh 2021-yil sentabrda, ikkinchisi 2022-yil may oyida bo‘lib o‘tgan.
Izoh (0)